金融High Tea 2012年9月17日
金融High Tea——金錢戰爭
2012年9月17日
美國聯儲局公佈推行第三輪量化寬鬆計劃(QE3)，當各界都睇淡QE的成效，甚至想等QE招數用老時伺機沽低股市之時，聯儲局主席伯南克竟然推出一個無限量的QE，話每個月要買400億美元按揭證券，直到失業率「顯著改善」為止，仲話到明即使美國經濟好轉但失業率無顯著改善，都唔會停止QE。
伯南克今次又係大印銀紙，仲開出空頭支票，話佢會印銀紙直至佢自己打贏場仗為止。伯南克呢招無限QE，大出市場所料，美元急跌，商品抽上，歐美股市揚升，港股在上周五大升582點，升到20692點。
大家要明白伯南克做緊乜，要知道少少歷史。在2008年金融海嘯之前，美國聯儲局帳上有9000億美元資產，你要知道聯儲局作為美國中央銀行，佢係美元供應的來源，聯儲局要買嘢，打個電話開張支票，錢就會衍生出來，不需要有黃金或其他任何國家貨幣去支持，即係鍾意印幾多銀紙出來都得。
2008年出現金融海嘯，聯儲局要用量化寬鬆(QE)的方法去救市，所謂量化寬鬆是放開聯儲局購買資產的數量，由於聯儲局買資產等如印銀紙，聯儲局透過這個方式發行大量基礎貨幣，谷入銀行體系中，錢多到水浸，逼銀行收到錢後再借出街。
聯儲局經過兩輪QE之後，將資產負債表由9000億美元擴大到而家接近3萬億，即係呢4年間，買咗2.1萬億資產，等如印多咗2.1萬億美元基礎貨幣入銀行體系。
再加印萬億美元
聯儲局而家又話搞QE3，每月購買400億美元的按揭證券，直至失業率「顯著改善」為止，即係每個月又印多400億美元。QE幾時會停？美國現時的失業率係8.1%，聯儲局最新估計到2015年，美國失業率先至會跌到6至6.8%，市場估計唔跌到7%以下唔叫做「顯著改善」，若然聯儲局要一直QE到2015年底，聯儲局將再泵水接近1萬億美元入銀行體系，即係咁多年夾埋印多咗3.1萬億美元出來，等如24萬億港元，記住個單位係「萬億」呀，你話幾恐怖。
美國聯儲局QE和歐洲央行早前的「無限買債」計劃，有一個本質不同，歐洲係買債不印錢，美國係買債兼印錢。歐洲央行計劃無限量買入出了財政問題國家的三年期以下短期國債，但歐洲央行有一個「沖銷安排」，佢買一元債，即係發行咗一元貨幣出街，就會自己發行番一元的歐洲央行票據，將資金吸回來，換句話佢一手買人哋國債，另一手沽自己債，就有買債而不印錢的效果。聯儲局只是單向買債，並無沖銷安排，等如單向增加貨幣供應。
伯南克呢個無限買債方案，睇嚟唔止有經濟意圖，仲有政治意圖。問一個簡單問題，聯儲局QE同減低失業率有乜關係？你話有關係，因為QE壓低咗利息鼓勵投資，老闆請多啲人，咪可以減低失業囉。我又問啦，美國QE咗4年，失業率搞來搞去都搞唔番落去，點解再搞多啲就得呢？呢個問題就比較難答啦。
表面睇伯南克係孤注一擲，佢大學論文就係話1929年美國大衰退就係因為央行不放水，才有10年蕭條，所以今次大放水一定掂。但伯南克搞咗四年美國經濟都未掂，佢而家好似散戶炒股輸咗咁，再加注，想賭到贏為止。
我就話伯南唔係咁蠢，佢出招一箭雙鵰，既想為奧巴馬助選，又催谷美國經濟。幫奧巴馬助選的動機太明顯了，過去現任總統連任機會甚高，但要在8.1％的高失業下連任的可能性好低，如今伯南克不但在選舉前兩個月出招，等如說「選奧巴馬吧，失業率由伯南克解決」。伯南克支持奧巴馬的動機好明顯，他雖然是在共和黨總統布殊任內上台，但現時共和黨候選人羅姆尼對他非常不滿，聲言若他當選伯南克2014年初約滿時將不會讓他續任，伯南克「義」助奧巴馬競選，也在情理之中了。
無限量QE是否這麼容易推低失業率，令人懷疑，其間接關係是聯儲局不斷買按揭證券，推低按揭息率，鼓勵人轉按，除了推升樓價，亦令有樓者減少利息開支，增加消費，推動投資和就業。你睇我講咗咁耐先至講完QE和就業的關係，就知關係比較間接。當然QE令美元貶值會增加出口，但美國本土就業以消費行業為主，出口幫助相當有限。
趁地產股回落揸
無限QE的直接效果是大量增加美元供應，美元匯價會跌，銀紙增加資產供應不變，資產價格會上升。這不光是一場貨幣戰爭，還是一場金錢戰爭，伯南克推低美元匯價，自然係「細佬」搵笨的行為，去年6月QE2完結後，美元慢慢回升，令經濟增長放慢，如今再QE，日本和歐洲兩個緊密盟友，都會因匯價上升出口減少受害，特別係經濟咁差仲唔知死日日搵釣魚島來搞的日本，很多日本出口巨企已開始大減薪大裁員，聯儲局再QE，就是踩在日本頭上，希望借貶值谷美國復甦。
這場戰爭不止關乎貨幣匯價，同時令大量平錢源源不絕地投入金融市場，並在環球的銀行體系中不斷衍生，催生各地的資產泡沫，以供應的緊缺度而論，依次序仍然是房地產、商品然後才到股票。
追落後要炒弱股
香港金管局早已部署好應對，聯儲局一公佈QE3，金管局馬上收緊買第二間樓的按揭，由按五成降到按四成。這個政策的約束性有限，因為現時炒住宅樓不活躍，估計打算揸幾間樓因而受影響的人較少，不過今日地產股可能因為金管局出招可能插一插，佢哋插低係短期買入短炒的好時機。
股票短期亦會炒起，但不要期望太高，有朋友問我會唔會炒到25000點、28000點，我話唔好過度興奮啦，睇住一兩個月先啦，現時未睇到歐洲可以終極解決債務問題，美國不斷QE亦不似好易推起美國經濟，現時股市回升是「炒作性」回升，不是「復甦性」回升，是短浪而非長浪。
港股相對其他資產類別，好處係便宜，在呢種市道，主調係追落後，炒弱股。我上星期四話太陽能股未到根本改善時，但上星期五「無限QE」的新聞一出，太陽能股再炒高。
我睇的是基本因素，市場炒作的是股價落後，根本唔使睇基本因素，因為太陽能股跌得多，照炒可也。由此推論，若炒作持續，弱股還會再升。
有朋友抱怨大市咁升法佢買落的華能國電
(902)竟然逆市大跌4.5％。我話今年煤價跌電價不跌，電廠賺錢，資金沽煤股買電廠股避險，如今美國QE，刺激風險胃納回升，棄強股買弱股，就沽電股買煤股，上周五中煤能源
(1898)大升7.6％，神華
(1088)升4.3％，愈細隻愈升得多，當然你可以話煤股升有基本因素，例如內地動力煤煤價連續三周回升，煤炭大省山西限制產量等，但都要等到QE3出台才爆上，自然有炒作原因。
美國QE，順勢而作，莫睇過長，都係跟炒已深跌的大股着數少少。
陸羽仁
上一頁 下一頁
金融High Tea 舊文
仍是區內投資市場最大風險所在，故此會先談中日問題，又或者正確一點說，中國現在面對的不是中日問題這麼簡單，而是整個亞太區的地緣政治風險問題。 
電郵
列印
獨立觀看字體
