炒夾倉又得米
2017年08月22日
恒指上周一度插穿兩萬七千點，今個星期開市指數反彈，暫時彈力麻麻，喺缺乏重要概念下，大市成交啱啱過八百億元，大戶只係個別炒作。
呢排內房股陸續公佈新一年業績，中國海外(688) 公佈截至上半年純利按年升咗25%至216.54億元，每股盈利升13
%至1.98元，建議派中期息股35仙。
中國海外去年基數已經唔低，今年有咁嘅表現，市場都幾欣賞，股價收市彈上2.8%，收報25.5元。中國海外業績靚仔，下個星期公佈業績嘅恒大乘機夾上，股價愈升愈高，結果收市急升17.9%，收報22元。
恒大融創借業績搶高
恒大同中國海外比最大唔同，係中國海外一向邊際利潤率高，恒大則主力放係搶市場，一味薄利多銷。
去年佢賣樓量已經做咗一哥，今年佢目標係希望提高利潤率。由於佢嘅生意額大，過去嘅利錢又薄，而家出力想鍊高利潤，空間會大啲，所以同行公佈業績好，股價偷步搶上。
除咗話炒業績因素，當然亦唔排除大戶趁機夾吓淡倉。恒大市值有番咁上下，加上累積升幅大，容易吸引淡友沽空搵食，經常都見到佢有唔細嘅沽空數字。
中環茶友一早教路，話呢類股份係好友淡友對撼嘅戰場，職業淡友通常好守紀律，沽空咗見到股價急升，佢哋都會先平倉避風頭，寧願到高位再沽過，所以佢哋睇準目標，唔會咁快收手，所以一個搵食方法係見佢跌得咁上下，就博大戶出手夾淡友，如果個位睇得準，兩、三日就已經搵到食。當然，呢啲係技術高啲嘅炒作要求，無咁上下技術就無謂諗啦。
恒大夾高，同樣有人玩沽空嘅融創中國(1918) 都升7%報19.18元，老闆惹火嘅萬達酒店(169) 升12%報1.96元。其他內房股碧桂園(2007) 升4.5%報9.56元；綠城中國(3900) 升4%報9.98元。
另一個炒業績帶動嘅板塊係內險股。平保(2318) 中期業績強勁，獲多間大行唱好，周一曾高見61.4元，收升0.75%報60.65元。市場憧憬其他內險股業績向好，太保(2601) 升0.9%報34.7元；國壽(2628) 升0.4%報23.25元；新華保險(1336) 升0.7%報收49.4元；中國太平(966) 升0.4%報23.4元。
有投資銀行家講起，話平保依家強調自己唔止係金融股，仲係科技股，公司喺產品同投資都加入科技元素，不過呢啲到目前為止都係包裝為主，大家看好平保始終係佢嘅壽險生意做得好，呢個係佢業務策略成功，其他保險公司係唔係做得到，真係好個別，所以用平保業績嚟炒內險股，都係藉口多啲，最緊要重係睇大市氣氛，所以如果想買內險股，其實未必有需要拾近圖遠，不如等平保跌番落嚟低吸可能仲實際。
乏火車頭升幅力度有限
內房同內險炒上，但佢哋嘅市值有限，撐高大市嘅力度都唔係咁夠，恒指借聯通(762) 混改方案獲批消息刺激A股上揚，港股隨A股起舞，恒指最多升173點，高見27221，午後升幅開始收窄，恒指收報27154，升107點；國企指數收報10751，上漲57點，成交金額819億元。聯通混改方案獲開綠燈，股價升3.52%報收12.36元；連帶中電信(728) 及中移動亦造好，中電信、中移動都升1%，為恒指貢獻16點升幅。油價回升，帶動「三桶油」齊升，中海油升3.69%報9元，貢獻恒指18點升幅；中石油(857) 升1.46%報4.86元；中石化(386) 升1.61%報5.69元，多隻藍籌斬斬埋埋叫做夠一碟。
陸羽仁
金融High Tea 舊文
來源 source: http://hdfin.stheadline.com
