中環在線：羅康瑞4分鐘solo：阿媽俾兄弟擺佈
■羅康瑞噚日記者會後大談家事。梁延宇攝
鷹君（041）爭產風波進入白熱化階段，上星期羅老太喺母親節前，邀請傳媒茶敍，由二子羅旭瑞、六子羅啟瑞陪同，大放金句。另一邊廂，鷹君主席、即三子羅嘉瑞近期密密增持，示威意味甚濃。四子「上海姑爺」羅
康瑞一直唔多表態，不過佢噚日就忽然有話說，指媽媽「俾啲兄弟擺佈同教唆」！
爆對方陣營有人變節
羅康瑞以往提到家事都係一句起、兩句止，噚日佢旗下瑞房（272）舉行股東會，羅康瑞明顯有備而來。當有記者問到羅老太近況時，佢先搖頭示意，指「一陣間慢慢同你哋講」。到記者會尾聲，佢支開公司財務總監，一個人solo足4分鐘。
佢指，媽媽「俾啲兄弟擺佈同教唆」、令家庭徹底決裂，係「羅家大悲劇」，直指：「我唔敢相信，媽媽喺證人台被盤問嘅時候，會點去捱！」
早前羅老太控訴貼身菲傭May姐，成為「終極無間」，偷錄佢嘅對話。羅康瑞講出另一個版本，指「工人係睇唔過眼，錄咗音，有機會聽到就知道」，更大爆對方陣營有部份成員已經「變節」，指「大家都見到，嗰邊最近得番兩個」。
最後，有記者問佢上星期母親節點過，公關即代答「羅生唔喺香港」，至於羅老太有冇邀請佢端午節一齊「包糭」？公關又搶答：「羅生呢排手痛！」真妙。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
