智取大市：復仇者夠鐘現身
■嚟緊有多隻大型IPO，氣氛唔會太弱，恒指下個目標維持32700點左右。
貿易紛爭平息與否，對投資者來說，早已有曬兩手準備，能短暫解決其實未至於係一件十分驚喜嘅事情，但姑且唔理達成協議本身對雙方經濟有冇利好，至起碼可博美國短期內唔再生事，投資者風險胃納會提升
，好友餓波咁耐伺機復仇，始終有利整體市況。
唔好忘記貿易戰期間，內地降準同擴大開放措施，中資股應受政策面所支持。喺嚟緊多隻大型IPO下，氣氛唔會太弱，恒指下個目標維持32700點左右嘅周線圖保歷加通道上軸水平。估計港股反映貿易協議利好消息過後，都係維持中短期慢升格局。
前排炒零售股、消費品股，上星期五炒到油股、煤炭股，呢條路線一直都係通脹概念，loop住炒落去機會不低。至於醫藥股，往績顯示好多時都係大型上落市裏面嘅贏家，同樣有增長概念嘅教育股盈利能力同股市關連度不高，亦喺近排跑出。如果恒指呈慢升狀態，呢啲板塊最有利。
環保概念如再生能源股之前炒作業績翻生追落後，同時亦受惠國策，個別股份今年PE只係個位數，相信仲有上升空間。大唐新能源（1798）3月至5月初股價一度累升逾八成，近期進入整固，但20天線樓上屢獲支持，有機會乘港股氣氛升溫而再炒上。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
