Money Walker：美元下行趨勢未扭轉
■聯儲局對加息取態仍偏向審慎，故美元中期即使不大幅下行亦唔會太強勁。資料圖片
貿易戰、油價走高、通脹升溫，一度帶動聯儲局今年加息四次預期上漲，推動美元早排突然翻生。當然，其他主要國家央行未敢為加息鋪路，令美元與主要貨幣息
差遲遲未見收窄，繼而令市場縮減對歐元與英鎊升值嘅押注，亦係支持美元走高重要原因。
先講美國自身因素，通脹加速仍屬可控，現階段毋須加快加息步伐遏止，而中美貿易戰雖未平息，但相信特朗普唔希望擾攘太耐，以免累及市場氣氛。非美國家方面，歐元區同英國經濟數據近期麻麻地，歐央行同英倫銀行議息後相繼放鴿，市場對兩間央行下次加息時間終於回歸理性。前者預計最早明年中啟動加息，後者則較大機會今年底再度加息，所以歐元同英鎊回勇時間亦要延後。
不過筆者傾向相信美元早前一波反彈僅屬短暫，因為其他主要國家央行始終會步入加息，而且美國加息周期已來到中後段。從技術分析睇，美匯指數後市較關鍵技術位為92.5左右水平，倘若繼續穩守該水平，先需要擔心美匯指數維持咗一年半嘅下行趨勢受到破壞。事實上，美匯指數自去年初見頂後，曾於去年9至10月出現反撲，但過後又繼續走低。
市場關心美元走強會否觸發新興市場危機，筆者傾向認為機會不大，話曬聯儲局對加息取態仍偏向審慎，故美元中期即使不大幅下行亦唔會太強勁。反而以美國為首嘅息口上升趨勢，對全球經濟前景影響可能更大，畢竟全球多國於不同範疇都已累積不低嘅槓桿水平，加息將超高槓桿引爆只係遲早嘅事。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.finance.appledaily.com
