【股場解密】有實體學校的教育股唔使太恐慌（歐陽風）
2018-6-15 10:15:31
【股場解密】有實體學校的教育股唔使太恐慌（歐陽風）
聯儲局議息會議後港股與大部份亞太股市都顯著下跌，加息速度加快，係咪就要清倉離場，一股不留？財經KOL最近都有類似言論，例如號稱是美股隊長
的財經KOL就在兩個月前大呼美股已經清倉，因為波幅突然擴大到佢好驚，但是納指在最近才見新高。
假如估中，美股隊長會受到更多財經節目抬捧及受訪，進一步增加知名度；估唔中，亦會因此而多咗人識，起碼市場會有人聽過叫人沽清股票果位專家，因此作出此等大膽估市言論不一定要中，最緊要夠激夠爆，然後搵啲圖表去SUPPORT自己觀點，咁又繼續有人識繼續可以開班授徒。
雖然港股形勢的確好弱，但是不是就要清倉呢？顯然唔係，事關本周一才出現大額北水流入，扭轉此前持續性的北水流出，無理由北水流入一日就玩完吧。北水追捧的股票，同香港散戶跟炒的教育、醫藥類股大致相似，但炒呢類股有好有唔好，好處是升起來特別強勁，壞處是太多人跟一沽即冧。
教育股受到渾水沽空美國上市的TAL影響而普遍下跌，假如TAL真係出事，無理由跌一成咁少，此股由今年一月約27.5美元升至最近高位47.6美元，升幅73%，假如正如渾水所講盤數有欺詐成份，周三晚係應該跌至少三成。
香港的上市教育股不是線上操作，大多數有實體學校有大量學生有政府註冊，造假的空間不多，除非啲學生都係假的，所以買教育股只要買貨真價實的，唔使太驚，半新股21世紀教育（01598.HK）最近股價偏強也開始有分析員跟進，值得優先留意。
股場解密 - 歐陽風 舊文
來源 source: http://www.winmoney.hk
