恆生指數
國企指數
恒 指波幅指數近20日

VIX指數 近5日

上証綜指
深圳成指
滬深300

文章漏咗/建議:按此通知

2018年6月1日 星期五

金融High Tea 2018年6月1日



金融High Tea 2018年6月1日
癲價又現
2018年06月01日
  白宮喺美國商務部長羅斯訪港京前放鷹,企硬話要對500億美元內地貨品加徵關稅,消息令兩國關係走向冷凍。

  有消息話若然大家無共識,羅斯可能取消訪華。對內地而言,美國沒完沒了,貿易戰無可能無痛解決,既然係咁都無得一味退讓,市場亦明白呢個係新常態,股市喺跌咗一日後反彈。

  人行逆回購有托市味道
  人民銀行公開市場昨日進行2200億元人民幣逆回購操作,當中七日期規模900億元,14日期同28日期規模分別600億同700億元。

  扣除昨日400億元逆回購到期回籠資金,人行昨日淨投放1800億元。睇番人行已經連續四日淨投放,合共3300億元人民幣,都幾有托市味道。

  除咗貿易戰呢個半新不舊話題,市場熱話係投地癲價再現。今次出現癲價不是出名樓貴地貴的香港,而係阿里巴巴總部所在的杭州,投地者係出名作風穩陣的恒隆。

  呢次恒隆系孖寶恒隆集團(010) 與恒隆地產(101) 豪擲巨資,連敗阿里巴巴、華潤地產和多個香港龍頭財團,投得杭州下城區百井坊商業綜合地,總代價差不多要132億港元,孖寶計劃投資超過200億港元,發展成頂級大型商業綜合項目。陸羽仁聽有份投地的大財團要員講,拍地底價為49億元,最終成交價較底價高1.18倍,樓面每平方米作價5.5萬元,成個投地過程超過七小時,出價336輪,競投激烈,出價最高的恒隆,

  最終投得心頭好。由於項目投資額唔細,參與競投的六間投標財團當中,包括港資的九龍倉(004) 、新世界發展(017) ;以及中資的華潤地產;還有「本地薑」近年全力拓展新零售的阿里巴巴集團。過往內地一線城市主要有北京、上海、深圳,其他係二線城市,但近年阿里巴巴全力協助總部所在的杭州,打造成智慧城市,有人將杭州吹起「新一線」,從恒隆出價咁勇,證明佢都好認同杭州發展方向。

  恒隆係老牌港資地產商,但佢哋亦係最早投資科技的家族,由大股東家族控制的晨興基金,就係小米投資者之一,所以今次佢出個價雖然外界覺得癲,但亦唔排除係好似海航投啟德地,癲價只係超前價。恒隆老闆陳啟宗同美國政圈、學術界關係唔錯,佢喺中美兩國成日嘈交之際落重注,反映咗佢對中美打口水戰的睇法。

  中環茶友話,好多人以為有網購或者資訊科技,就唔需要商場或房地產。

  實際科技又產生咗新需求,科技創造財富,造就咗對住宅龐大購買力,網購同樣增加對倉貯等需求,所以不少科網公司都對物業項目有興趣,只不過佢哋暫時就以自用思維主導,未係大力投資。雖然佢哋買物業或發展項目為咗本業,但出手一樣可以好豪。

  安寧有地股價時有炒作
  講起土地有價,陸羽仁曾經分析過的冷門股安寧控股(128) 股價呢兩日飆升,再創新高,收報1.3元,升咗24%。

  安寧有塊地喺荃灣,用作顯達鄉村俱樂部,呢樣生意認真唔好做,但就食咗塊地皮,公司管理層早前申請改變用途。大家睇死覓地小組都係搵唔到地,呢啲改變土地用途補地價方案,就變咗實際得多,所以市場每逢喺相關審批日子就炒作吓。按正路講,顯達改作發展只係時間問題,呢啲股平時無錢賺難派息,但過關就食爆棚,所以又係之前所講,有閒錢就可以高沽低揸。

  五月過去,最後一個交易日港股上升,恒指收報30468點,升411點,差唔多收復前日失地,特朗普波動市又畀醒目資金一個搵銀機會。國企指數收報11978點,升209點。MSCI調整今日起生效,尾市成交急增,成交金額大增至2037.54億元。入摩基金會有一陣追貨潮係預期之內,但真正影響要等第一個浪過咗先睇得清楚。

  以整個五月計,恒指累積跌339點;國指累積下跌353點。藍籌騰訊(700) 升咗1.%,收報399.2元,暫時未過到400元心理關口。

  藥股繼續跟住內地炒,藥明生物(2269) 再升1%,收報87.95元;石藥集團(1093) 升0.82%,收報24.55元。

  除咗安寧勁升,另一隻陸羽仁早前分析過的利福國際(1212) ,股價尾市急升,一度急升63%,高見28.05元,收市仍升43%,報24.7元,成交1.36億元。

  陸羽仁
金融High Tea 舊文