智取大市：貿易戰處樽頸位
■關稅紛爭暫時睇到樽頸，長遠嚟講呢場大戰會由貿易轉移至科技戰場。資料圖片
美國參議院大比數通過非約束性決議，想增加國會於貿易紛爭之中嘅話語權，擺明反對2,000億美金中國貨品關稅。CNBC話議案唔會對特朗普嘅計劃構成約束力，但係CNBC本身為親特朗普傳媒，事
實上，國會反對聲音夠大，先係重點。
2,000億美元中國貨關稅計劃公佈後，港股周三只跌唔夠400點。投資者似乎賭緊新關稅方案難以實現。
回顧4月美國公佈向華徵收500億美元中國貨品25%關稅，初步清單大約1,300種貨品，經過兩個月公眾諮詢後，貨品項目調整至800至900種，出現過討價還價令部分貨品從清單剔除。而調整咗嘅關稅清單，多咗航空航天、訊息和通訊技術、機械人、工業機械、新材料等等本來美國已相當忌諱使用嘅中國貨，對美國嚟講加諸關稅屬政治正確，難有反對聲音，呢一著唔排除係令計劃喺諮詢之中較容易過關。
當最易過關嘅貨品過咗關後，接住落要喺其他較難過關嘅中國貨之中抽關稅，要㩒得住本土反對聲音就更困難，參議院嘅反彈只係一例。關稅紛爭暫時睇到樽頸，港股反彈，原因就係咁。當然，長遠嚟講呢場大戰會由貿易轉移至科技戰場，但相信會係反彈市過後嘅事。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
