國企指數
恒 指波幅指數近20日

VIX指數 近5日

上証綜指
深圳成指
滬深300

2018年7月13日 星期五

金融High Tea - 陸羽仁 2018年7月13日

金融High Tea - 陸羽仁 2018年7月13日

短命反彈市唔易玩
2018年07月13日
  港股除咗受貿易戰影響,世界盃效應喺呢兩日都明顯咗,皆因賽事入到直路,賽事轉到凌晨舉行,而唔係晚上時間,所以好多股民都掛住睇波,尤其係周四晚凌晨英格蘭對克羅地亞,好多睇開英超嘅股民,都寧願捱夜睇波。

  睇好英國係非理性行為
  英

格蘭今年打入四強,令好多三獅兵團死忠鐵粉興奮不已,大讚呢屆幼獅有潛質,到英格蘭輸波後,英國媒體依然力撐,預言兩年後的歐國盃可以捲土重來。中環茶友中有包拗頸一族,直言三獅兵團無乜冠軍相。

  茶友係睇波不賭波的冷靜派,佢話睇番近年成績,雖然克羅地亞係前東歐小國,但民族體質強悍,睇佢哋喺籃球、排球、水球呢啲體力化比賽表現,證明體能質素過人。過去已經有打入過四強經驗,出過蘇拿等名將,往績絕對不輸英國。喺昨晨賽事,英國只能靠死球獨沽一味,令人想起早幾屆靠碧咸「七旋斬」搵食,咁單調嘅打法,遇著強隊根本無運行,只不過今屆走線靚,加上有啲運氣,所以先會有好成績。

  茶友笑言,睇國運英國都唔似會攞到世界盃啦。記得當年東西德合併,即刻就封王,O依家英國脫歐搞到一頭煙,又點會喺今次變相的「歐國盃」稱霸呢?茶友一輪嘴咁講,其實都係馬後炮。因為如果要數,事前都可以數到克羅地亞好多不利因素,譬如佢哋已經打咗兩場加時,兵疲將乏好蝕底。

  不過,無可否認的是好多人買球,係主觀多過客觀,呢樣嘢博彩考運氣無乜所謂,但買股就唔同。買股最緊要係計數睇值博率,要減少感情因素。好似中美貿易戰,市場就開始計吓數,究竟應該點消化呢個因素。

  渣打大中華及北亞區首席經濟師丁爽估計,全球經濟上半年增長4%,內地上半年經濟增長有6.7%,幅度不及去年同期,主要受到去槓桿、房地產緊縮及融資改革政策影響。他預計,中美貿易戰將拖低內地經濟增長,預料第一輪關稅清單,將拖低經濟增長0.15個百分點;若計及新一輪2000億美元的徵稅清單,將再拖低0.25個百分點,合共對經濟帶來0.4個百分點影響。他認為,加徵關稅未會對中國造成毀滅性影響,當經濟增長目標不能達到6.5%時,阿爺會運用財政政策、放寬調控等措施刺激經濟。

  中美貿易戰升級,市場有點措手不及。當美國宣佈可能擴大徵稅範圍,內地似乎仲諗緊點樣回應。加稅對經濟影響有數得計,市場逐漸消化加稅消息,O依家大家最關心係貿易範圍會唔會燒開去。暫時阿爺無乜明確表態,另一方面,人仔匯價昨日午後大幅拉升,離岸日內漲近500點,在岸一度漲破6.66關口,所以內地股市造好,上證指數收報2837點,升咗2.16%;深成指數收報9273點,漲2.8%。

  合資車股受政策影響
  雖然人仔反彈,但市場好怕人仔匯價會再跌,O依家市場先睇6.7水平,但估計呢個並非內地必須死守的底線。當人民幣跌穿6.7水平時,雖然內地好有機會出手減慢跌速,但短期仲有機會下試6.8水平。

  恒指跟隨A股企穩,全日變動唔大,收報28480點,升169點;國企指數收報10752點,漲94點,喺捱夜睇波效應下,成交只有912億元。香港和內地股市跌得多反彈一下,非常正常。但早前試過一兩次反彈都唔維持得耐,令人擔心今次反彈浪,都可能係玩一兩日就會完結,短命反彈市比較難玩。

  有傳美國商務部與中興通訊(763) 達成協議,中興很可能在8月1日前正式解除禁令,中興股價急飆25%,收報13.94元;其他科技股造好,金蝶國際(268) 升近10%,收報8.96元;金山軟件(3888) 升4.6%,收報21.7元。

  德國媒體報道,寶馬計劃增加與華晨中國(1114) 合資公司華晨寶馬持股比例,由目前各佔一半,增至75%或更多,即華晨持股將減至最多25%。華晨中國午後受壓,逆市急跌13%,收報11.98元。汽車係內地開放市場措施重點之一,所以合資汽車股隨時會有敏感表現。

  陸羽仁
金融High Tea 舊文