國企指數
恒 指波幅指數近20日

VIX指數 近5日

上証綜指
深圳成指
滬深300

2018年7月18日 星期三

金融High Tea - 陸羽仁 2018年7月18日

金融High Tea - 陸羽仁 2018年7月18日

有權用盡
2018年07月18日
  港股結束反彈,恒指回跌367點。大市周一成交跌至700億元,雖然指數勉強報升,但動力明顯不足,昨日成交只得782億。O依家反彈結束,回調多少就要睇有乜消息影響。要留意係美國特朗普不斷出招,令全球市場陷入不明朗,資金避險情緒升溫,結果令美元

資產得益,其他市場難免受壓。

  美元資產強勢畢呈
  特朗普日日指點江山,標準完全由佢定,佢忽然之間話對伊朗實施制裁,可以考慮對個別國家有豁免,容許部份國家向伊朗買油,消息一出即刻令國際油價急挫4%以上,石油股回調。特朗普咁講明顯係想短暫壓抑油價,以利11月中期選舉,他制裁伊朗忽然大轉向,唔排除過完中期選舉後,佢又出招推高油價,益吓佢啲石油商老友。

  美國總統咁「神經刀」,令其他國家暈頭轉向,客觀效果係資金覺得玩乜都唔安全,惟有走入美國保護傘下最安全。因為無論特朗普講乜,都只係對美國有着數,所以美元近日轉強,反而金價就無乜反應。特朗普日日說了算的風格,令市場連黃金都唔信,美元資產成為最大得益者。

  同中環大賓卡飯局,佢講起美國近日喺國際貿易同經濟事務表現,根本係頤指氣使,不把任何一個國家放在眼裏,同時把美國在政經領域霸權充份發揮。大賓卡感受最直接係美國透過控制全球美元結算權,對全球金融市場作出監控。現時全球貿易主要用美元計價交易,基本上沒有一間金融機構,能夠逃離美元交易範圍,而所有美元最後都要到美國結算,透過呢個機制,美國操縱所有金融機構經營命脈,只要美國一聲封殺,相關金融機構就被佢扼住咽喉,無一例外。金融海嘯後,美國開始增加運用美元霸權地位,對全球金融機構加強操控,所以佢話罰邊間銀行就罰邊間銀行,隨時開出10億、20億罰單,無論天涯海角都好難走甩。

  美國本身係政經超級霸權,佢只要輕輕拉動機制,就可以收割巨大利益,O依家特朗普上台,以其商人本色,根本唔介意有權用盡,其他國家根本難攖其鋒。有人話,美國咁玩法,長遠遲早衰。呢個說法係咪啱,要十年八年先知,但O依家就係美國威晒。雖然特朗普訪問行到邊畀人噓到邊,但美國人對佢嘅支持度不跌反升。

  特朗普有權用盡,短期效果係令資金流入美元資產。理論上港元同美元掛鈎,有人覺得港股都算美元資產,但咁樣諗的人,恐怕出現咗個唔係咁美麗的誤會,因為港元雖然同美元掛鈎,但香港上市公司九成九唔受美國保護傘,資金轉入美元區,香港恐怕不易受惠,資金離開亞太區,香港就一齊中招。若然情況持續,甚至有可能受到衝擊。

  舜宇遇狙擊應聲倒下
  政治經濟風雲變幻,愈來愈多投資者靠邊站,加上內地銀根收緊,搞到港股乾水日益明顯,大市有氣無力,恒指收報28181點,急跌357點;國企指數收報10591點,跌112點,成交只有782億元。騰訊(700) 跌1.5%,收報375.8元;小米(1810) 跌0.7%,收報20.9元。花旗發表報告,下調騰訊(700) 目標價,由原來524元,下降至514元,相當預測2019年非通用會計準則下市盈率38倍。花旗預料,騰訊第二季網遊收入放緩,但相信已大致反映負面因素,展望今年第三季及下半年,料網遊可望復甦,因多個遊戲於六月底至七月初推出。騰訊8月15日收市後公佈第二季業績,但花旗提前一個月就搶先出來唱淡。

  沽空機構GMT指舜宇光學(2382) 存在欺詐性特徵,如內部現金流有所增長,同時外債繼續增加「有點奇怪」,不過現金餘額、應收帳等並沒有誇大。舜宇股價應聲倒下,收報142元,跌咗6.7%。其實,陸羽仁近一年對高估值手機股無乜興趣。

  大市氣氛惡劣,個別半新股力抗逆潮,碧桂園服務(6098) 一度炒上13.5元,創掛牌新高,收報13.12元,升2.3%。

  陸羽仁
金融High Tea 舊文