國企指數
恒 指波幅指數近20日

VIX指數 近5日

上証綜指
深圳成指
滬深300

2018年8月3日 星期五

財演算法 - 蔡嘉民 2018年8月3日

財演算法 - 蔡嘉民 2018年8月3日


【財演算法】你係咪真係認識收息?(蔡嘉民)

2018-8-3 8:00:26


喺大學讀過金融嘅朋友,或者股壇老手相對都會知道咩係派息,咩係除淨(Ex-dividend)。但係好多初哥都以為收息真係會令你有額外回報,即係如果有隻股每年派5厘息,就代表持有嗰隻股票除左股價回報之外,年

回報多5厘。因為好多人開始接觸股票之後,未必有頭緒點樣估第二日隻股票升定跌,或者點樣去分析未來一個月隻股票嘅大致走勢係點,就會先留意一啲客觀事實或者數字先。例如市盈率,股息率等等。

可惜佢地接觸左股票一段時間,但又無的起心肝學更多野嘅時候,當有人問佢買咩股,佢會話「梗係買高息股啦,年年賺5厘,好過你買樓收租啦」。但當你問佢知唔知咩係除淨之後,佢未必答倒你,就算知,都未必認清發生緊咩事。甚至有朋友同我講,「收息好易啫,喺除淨日前買入,除淨之後賣出,舊息袋袋平安,收完咪走,咁就袋幾厘,唔通長揸咩」。當然,聽完得啖笑。

另外,並唔係好多高息股除完淨股價都會上返高位。例如匯豐,計埋息,揸足10年都係蝕。本地仲有好多高息股,其實每年一路除淨一路跌,拎完啲息都唔夠補返股價輸嘅幅度。所以,最簡單方法係,開幅圖出黎,睇睇過去5年10年,計埋股息,睇下係咪真係有一條向上嘅資產曲線。

另外,做做下高息股嘅回測,發現一個有趣現象。有某啲股票除淨前,股價會升一浸。然後喺除淨後,即股價調整後,股價會跌一段時間,可能係一星期到一個月不等。暫時唸倒嘅可能性有3個。一,有一類人習慣喺除淨前買入,除淨後賣出,「試圖」收息;二,有一類人發現啲股票長期唔升,特別係除淨後,所以咁做,等下次接近除淨先買入;三,啲人發現呢個Pattern,繼而跟風,將呢個現象自我實現。

財演算法 - 蔡嘉民 舊文
來源 source: http://www.winmoney.hk