金融High Tea——永無蝕本的邏輯
2012年7月20日
■電能實業公佈中期純利43.3億，較去年同期利潤40.6億，增長6.8％。
港股舞上舞落，你估佢落佢上，你估佢上佢就落，前日跌完，昨日輪到升，港股昨日開市升百幾點，到十點半再升多百幾點，咁就收夠籌，隔夜淡倉又死埋，恒指升319點收市，升幅1.7％，多過內地的0.8％升幅。
昨日發威的是內地金融股，近期較強勢的內險股有表現唔奇，但比較弱勢的內銀股昨日都得，工行(1398)升2.5％，建行(939)升2.7％，我唔知內銀係唔係死貓彈，近日工行、建行都跌到息率有6厘，如果你夠遲鈍唔睇財經新聞，唔怕佢再跌，或者佢跌你都唔知唔理的話，買內銀收息好過放錢在銀行，反正一年股價跌6％都有利息補貼，唔跌就𡁻晒高息。
四叔話樓價難跌
樓價高低永遠係談不完的話題，恒基(012)主席李四叔昨日又出來講嘢，佢維持講「買股好過買樓」的概念，話未來政府增加土地及公營房屋供應，供應多「樓市不會爽」，叫投資者買股好過買樓。
李四叔係地產商，佢咁樣唱衰樓價，唔怕人唔敢買樓乎？佢可能驚唱得太衰，昨日補補飛轉軚話樓市唔會升但亦唔跌得去邊，主要因為近十年本港建築費持續上升，舉例來說，十年前，屯門一個住宅項目，建築費約每呎600元，但目前整體建築費已增至逾3,000元，認為未來建築費不會回落，主要是本港建築工人少，未來又有大型基建工程陸續上馬，需求上升。
李四叔此言有少少問題，因為當中存在一個永無蝕本的邏輯。發展商貴價投地，加上？貴的建築費，再加起碼三成利潤，成本高樓價就無得跌。或許過去10年自沙士低潮之後，樓市有升無跌，發展商賣樓必賺的邏輯在不斷運作中，但如果呢個邏輯成立，推前少少又點解釋1997年香港樓市崩盤？當年投地投出天價，人工已相當貴，按四叔的邏輯樓價唔可以跌，但結果是跌到四腳朝天。
樓價由供求決定，多人想買，少數可以賣，樓價就升，反之則跌。成本高和樓價唯一有少少關係之處是發展商一般不想蝕賣，若樓價回落，佢地又有財力頂時，就唔想減價掟貨。但若果出現漫長的跌市，相信無發展商可以幾年唔賣樓啩？不如我換一個理由畀李四叔叫人唔好太睇淡樓市，美國佬而家話低息到2014年底，如果佢經濟比想像中差啲，低息期更長，樓市又唔係咁易跌喎。
電能靠海外利潤
講番轉頭，我就幾同意四叔講而家買樓不如買股。唔係一定要買股，但若果一定要買樓投資，買地產股抵買過樓好多，你睇恒基市價帳面值比率是0.58倍，你見過發展商按成本價打58折賣樓未呀？而家佢地啲股票就係咁作價。若果唔睇好地產股前景，點解覺得買樓好？
香港做生意愈來愈難，特別是公用事業，唔係話加就加。經營港燈的電能實業(019)公佈中期純利43.3億，較去年同期利潤40.6億，增長6.8％。其中香港以外業務盈利增13.4%至25.8億元，香港業務盈利則倒退1.5%至17.5億元，是由於港燈因利息開支和遞延稅項調整上升。港燈上半年售電量52.03億度，按年增長3.4%。
成本上升，電費唔加得多，香港發電業務無乜肉，李超人當日發功去買英國電網和水廠，如今才能靠海外業務保持增長，香港公用事業都變成揼石仔的雞肋生意啦。
陸羽仁
上一頁 下一頁
金融High Tea 舊文
電郵
列印
獨立觀看字體
