金融High Tea 2012年10月8日
金融High Tea——一路鬧 一路炒
2012年10月8日
■黃金周內地旅客人數估計增長10%至15%，但人均消費卻不增反減，令零售業大受打擊。資料圖片
上期講到美國聯儲局主席伯南克大量印鈔放水，放出金融暗物質，搞到全球投資市場大亂，結果係美息低、美元跌、美股升、通脹合理，美國好正，其他國家好痛。
單嘢有下集，呢頭伯南克話經濟好唔掂失業率好高要搞QE3(第三輪量化寬鬆)，嗰頭宣佈放水後美國勞工部公佈9月美國失業率意外地下跌0.3個百分點，跌到7.8%，係四年以來的低位，遠比市場預期的8.2%為好。相信睇到呢個數字最開心的是美國總統奧巴馬，佢上任以來最大傷疤係搞唔低失業率，而家臨尾整一個「意外」驚喜，對提振選情大有幫助。美國成日話中國的數字有水份，但我睇到美國在11月選舉前公佈的最後一個失業率竟然可以咁急跌，真係唔知係唔係「意外」，只能歎一句，甚麼也是政治。
美失業率急跌有「驚喜」
杜指上周五收市升34點，收13610點，距離2007年歷史高位14198點，只差4.1%。奧巴馬上任之初，在2009年3月杜指曾見低位6469點，引用梁特首之辯解，奧巴馬當日面對的金融低谷是上任留給他的爛攤子，如今4年後佢搞到杜指由低位升咗1.1倍，你話佢對有錢人唔好，好似唔係咁喎，佢容許伯南克印錢不手軟，自己又沒有大力削赤，最受惠的不是那99%窮人普通人，而是那1%手持大量資產的富人，所以政客話「Change」(改變)，你信佢就老襯啦。
奧巴馬加伯南克，就是搞出現在這個局面的人，即使美國投資界都媽媽聲，因為在全球經濟放緩之際，無人預計今年下半年股市可以大升，基金倉位不足，睇住美股個市絕塵而去，自然係媽媽有聲，呢個升市被美股交易員稱為「最討厭的升市」。你唔好理，總之佢地有辦法搞升個市。
美股第三季意外地升得太多被視為討厭，我哋個股市卻相反，係「最討厭無升市」。港股唔掂同內地唔止無上高位，仲要創4年低位有關，美國領袖換屆，中國領袖也換屆，點解美股見新高、大陸股市要見新低呢？當然有美國水多、中國水緊的基本因素，但亦有一個政治因素，美國總統係民選的，要走民粹政治，要各階層都高興，所以政客發功大力放水搞高個市。中國係專權政體，在換屆前往往比較動盪，幾次黨大會換屆前都有政治局委員倒台，從北京市委書記陳希同，到上海市委書記陳良宇，再到今屆重慶市委書記薄熙來，選前政局動盪，高官無人敢郁，有大政策都唔敢出台，大手筆救股市都欠奉，有力都留番新老闆上場前後同佢賀喜好過。
過去半年，內地管理層托市力度唔係多過平時，係少過平時，但可以估計，隨着十八大局勢明朗化，特別新領導在11月上場，大陸股市可以睇高一線。所以遠的不看看近的，10月股市大勢，還是看好之中。
在這種扭曲的市場中，你不用扭曲的心態去做，可能做多錯多，例如堅持「買入並持有」(buy and hold)的長線投資策略，好多時見完隻股升，又見番隻股跌，都係得個桔。所以最好的做法係「一路鬧，一路炒」，唔信大市可以好好景不斷升，又唔會錯失炒一個浪的機會。
避弱股 炒強股
雖然話大市短期向上，但都係最後避開弱股，炒作強股。先講弱股，我認為一眾同自由行有關的珠寶、零售甚至酒店股，都會慢慢變成弱股。睇呢個黃金周已見端倪，本來8、9月旅客下跌，旅遊零售業界好期望呢個8日超長黃金周可以帶來生意高峰，訪港內地旅客可以比去年同期增加20%，可惜事與願違，旅遊業議會估計，黃金周內地旅客人數將較去年增長10%至15%，但由於他們減少購買高價貨品，人均消費卻不增反減，每人只消費5,000元至6,000元，降幅約25%。
旅遊業不振，不止旅遊業、酒店業，零售業亦深受打擊。麥瑞瓊更用「震驚」兩字形容8月份零售銷售情況，話8月旅客人數都有28%增長，但零售銷售額卻僅上升4.5%，感到震驚。零售業面對經濟下滑，但人工和租金卻不斷上升，有硬着陸風險，呼籲零售商需要留意庫存及資金周轉，否則未來有裁員甚至倒閉的可能。零售管理協會今年已兩度調低全年零售銷售預測，由最初估計的15%增長，最新調低至7%，將是2004年內地開放個人遊以來零售銷售最少的增幅。
內地旅客外遊除了受經濟放慢的周期性影響外，或許正出現結構性轉移，外遊對象國愈來愈多，內地愈有錢的遊客，旅遊目的地由港澳等近中國內地的地區，向外擴散，通俗點話「嚟幾次香港已玩厭咗」，再加上本地反內地人的情緒愈來愈強，梁特首又「順從民意」日日派人去打水客，令人擔心連貴客都趕走埋，有咁多股好揀，和自由行的股票都係少掂啲好。
講完弱股講強股，本地股中短線睇都係地產股最好，你睇新地
(016)屯門盤唱高開低，由1.1萬元一呎一直賣到7000幾元，去了800幾伙，7000幾元已是超高價，做地產點怕成本高。過去好落後的新世界
(017)、恒地
(012)和合和
(054)早已超越今年3月的高位，長實
(001)、信和
(083)也在高位附近，新地受官司困擾，比較落後，上周五收112.5元，距離3月高位120元還有相當距離，會唔會追落後追番上呢？
若果買內地股選擇更多，比較安全的策略亦是買強股，中國海外
(688)、華潤置地
(1109)、騰訊
(700)今年以來都是一條上升軌咁向上，連4月起的跌市對它們都影響不大，這些強股可等回吐時吸納。中國海外過往每跌到50天線就有支持，佢上周五收19.8元，50天線是18.4元。華潤置地就飄忽少少，但亦係到50天線左右可以彈，上周五收17.14元，50天線是15.8元。
騰訊仲勇啲，佢在更急的上升軌中，通常回到20天線就上，上周五收264元，20天線是254.4元，50天線是244.1元，佢走勢和美國科技股特別係蘋果有一定同步關係，若果蘋果大跌，佢先至會回到50天線。
有人話買強股已經升得多無肉食，買弱股可以博佢由跌轉升大翻身，你捉得中的確係咁，不過時間唔易捕捉，好似內銀股係弱股，如果你去年11月底在4.1元的低位買工商銀行
(1398)，坐三個月一個翻身，在今年3月已經上到5.7元的高位，食到盡有近4成回報，問題係你揸要揸得低，高位又要肯走，唔走得個桔，因為上周五佢都係收4.63元，只是去年12月的價位，你夠膽博而家都可以買佢博有另一個浪。但炒強股食波浪唔同，好似中國海外，一兩個月又一個浪，唔貪心食10%，都唔係太難捕捉，半年唔止食一次，可以食幾次，當然如果定埋10%止蝕，真係睇錯捨得斬纜，就更加保險了。
陸羽仁
上一頁 下一頁
金融High Tea 舊文
而出現變動，主要原因是現在的富豪，身家與股票的價格有密切的關係，就以全球富豪排行榜首兩位、即微軟的蓋茨，及股神巴菲特，其身家亦與股票市場的表現掛鉤，故此如果他們希望身家繼續增加，他們最希望的是股票市場繼續有好表現。不過，股票市場的興衰，又是否真的可以惠及實體經濟？ 
電郵
列印
獨立觀看字體
