金融High Tea——扮港人港地
2013年10月10日
新地(016)開賣九龍站天璽，搞出一連串回贈稅項的減價優惠，搞到啲經紀癲晒咁去搵客，成為中環茶餘飯後的話題。
我都收到好多經紀打電話來或射來的短訊，講到入飛買實發咁。首日又真係俾經紀搵到客去排隊，映出來打咗個蛇餅，心諗天璽最平個單位都過千萬，香港真係多千萬富翁啦。
新地幾日收咗300幾個客登記，有番啲信心，除了首批30個單位外，周二再加推30個單位，在周六發售，並聲稱引進「港人港樓」原則，第二批加推單位只限香港永久居民以個人名義認購，由於新地首批單位搞出連串優惠，包括代買家付七成買家印花稅(BSD)及七成普通印花稅，第二批唔畀外地人或公司買，即係唔使再津貼15%買家印花稅的七成，少津貼樓價10.5%，都係大數目。
大孖沙請食飯講起此事，話新地今年久未賣樓，唔想交白卷，點都要減價減得深啲，推天璽時若係外地人或用公司買樓，所有津貼加埋佔樓價三成幾，本地人唔使津貼買家印花稅優惠都佔樓價兩成幾，減價咁多，務求一試成功。如今有300票在手，當中有七成是本地個人客，應該都食得晒兩批60個單位，自然想減優惠。第二批加推單位扮吓港人港地，查實係減內地客和公司客優惠。
天璽去貨炒不起
大孖沙咬住鮑魚，話新地老闆的刑事官司有排未打完，都幾心淡，疊埋心水重注去上海玩，所以香港似係落雨收柴，估佢哋賣咗樓套咗現都唔會太積極在香港投地。有錢人首重安全，新地江哥和聯哥會認為上海安全過香港囉。
佢仲話即使天璽順利去貨，都唔使擔心樓市熱得起來，過去炒家呢頭在售樓處落幾個巴仙訂嘜到貨，嗰頭已叫經紀加5%、10%放出街。家有特別印花稅，半年內賣樓要畀20%，點炒？所以發展商沽咗貨，啲貨亦變死貨，唔會馬上流出街，一個樓盤好賣，亦不會炒熱個市。
你睇新地股價就知，周一話佢減價賣樓，由上周五收市價105.1元插咗落嚟，呢兩日收票多減優惠，個價無乜反彈，都係得102元。
會德豐觀戰肉緊
天璽減價，有茶友問，你估邊個最關心呢？座中有醒目仔答，會唔會係會德豐(020)老闆吳光正呢？答案果然係咁，醒目仔解釋，天璽劈價開售，呢個盤唔係全新項目，新地已經賺咗啦，記得天璽首次推出，又係撞啱個市唔好，發展商都係用大包價搶客，當時仲賣得平過家，所以今次劈價就算深啲，其實都無乜所謂，反而會德豐係西九龍，合組財團重本投到柯土甸站上蓋，呢個盤係大製作，當然唔想一開就「彎彎」。早排呢個項目申請售樓紙終於獲批，大家都睇緊佢點開價打響頭炮，家見到咁形勢，自然要金睛火眼睇住。
醒目仔笑言，會德豐近兩年好勇，係將軍澳連投幾塊地皮，終於係衝過終點前，壓過新地成為區內大地主，不過，除咗香港，該系公司幾年間在內地買咗唔少地皮，呢幾個月內房回春，金九銀十銷售強勁，香港新盤就算要睇多陣，都有內地頂住，所以小股東唔使緊張喎！
樓市有新聞，港股則仍然係睇美股，杜指連續兩日跌逾百點收市，雖然內地股市續勇，恒指全日收市跌近150點，險守兩萬三關口。撇除高盛減持吉利(175)股份上板，實際成交只得523億元。港股暫時仍有外圍消息主導，但內地長假後復市偏好，市場相信若債務上限分歧解決，大市有條件突破。
陸羽仁
上一頁 下一頁
金融High Tea 舊文
