智取大市：騰訊沽文化中國有玄機 - 晉佳
■近排唔少散戶買重阿里巴巴概念股。
唔睇指數，只係睇個股，噚日港股嘅反彈相當可觀，創新支付(8083)可以單日勁升23%；騰訊(700)小時圖喺星期一做咗一個RSI雙底背馳之後，噚日就急彈5%，捉得到反彈，短線回報自然可觀。
但係，呢種反彈出現一兩日後，心情反而最令人不安，唔博反彈又驚蝕桌，博又驚掉頭再跌。未來兩三日，睇怕都chok餐飽，先至有新方向。
個個夢想一朝發達
如果呢一刻叫你估博短線反彈買乜？不外乎係波幅夠大、成交夠大嘅科網、「雙馬」概念股。近排唔少散戶買重文化中國(1060)、中信21(241)，講到尾，都係想一仗功成發大達，如果博中咗環球科網股熱潮仲有最亢奮一幕，文化中國由個幾升到3個幾，破埋頂衝4蚊、5蚊，然後帶動所有雙馬概念、科網概念喪炒，發達故事又一個一個咁走出嚟，周街都係民間股神，諗得咁美好，自然早買早享受。
至於其餘中資股早已經write off兼且放喺床下底，原因係，唔止全世界所有男人，而係全世界所有投資者，都係最怕遇到一件唔上唔落嘅死魚。
說穿了，對一般散戶、尤其後生仔嚟講，買一隻唔能夠睇到改變你財富狀況嘅股，就已經負擔一個非常沉重嘅機會成本，講到尾，人係缺乏耐性，之所以而家唔少散戶將發達希望，交託喺文化中國同中信21身上。點解突然間形成咗呢種急功近利嘅諗法？
原來最近幾個月，股市出現咗一輪亢奮潮，有一大批成功嘅圖表，令大家馬後炮地諗番轉頭，「如果我10月時睇到銀娛(027)破頂，再喺彩票股眾彩(8156)大成交時破位買入，就可以最多贏足10倍」，又或者「復牌買中信21，捱一輪價再爆升都有機會賺一倍，其他概念股冇理由一轉都唔炒啩」，近幾個月往績實在太多成功例子，令閣下覺得文化中國升到4蚊、5蚊又有乜出奇。
場內掟貨散戶硬接
對股份有想像，絕對唔係問題，之但係太多人發同一個「文化中國」夢，睇怕未必咁易實現了。騰訊喺平均價1.8元沽貨，事實上又唔似貨落強者，原因佢喺場內散貨，似乎都有大批老散接貨，如果係想貨落強者然後炒上，照計佢會場外配股畀一班大炒家，唔會輕易將貨流出市場。
講到呢度，幕後想散貨多過貨源歸邊，就令晉佳認為文化中國唔似係一個變倍器嘅希望，如果高過騰訊個價出貨，已經可以當係超標完成。
晉佳都想文化中國炒得上，咁自己都可以炒埋一份。之不過，連騰訊掟概念股都要散畀散戶，仲有幾多概念股大戶肯接？科網熱潮係咪仲有終極亢奮潮，晉佳確實有些少疑問。
晉佳
本欄逢周三刊登
上一則: 中環迷你裙：線上旅遊網大戰 - Samantha
下一則: 魚樂無窮：協鑫大圓底坐四望五 - 唐牛
智取大市 - 晉佳 舊文
