搓波博反擊
2014年06月20日
美國聯儲局開完會，一如預期減少買債100億美元，但不能不佩服美國人的口技，在有心人吹風下，聯儲局「只係」減少買債被理解為好消息，杜指借勢彈高，收市升98點，再次試吓有無機會挑戰17000點心理關口。
慳使子彈等月結
聯儲局主席耶倫在記者會上，對利率趨向講得比較溫和，表示美國通脹同就業情況，仍然容許美國維持低息一段時間。呢個都係聯儲局口技常用的方式，總之口風時軟時硬，要放硬料時候，就用不露面的吹風方式，以免效果太驚嚇，萬一衝擊太大就縮番轉頭；軟嘅就唔怕公開自己講，好似耶倫在記招，姿態就係軟多過硬，所以我睇聯儲局手影，係要底面兼顧。
美股升得咁開心，不過到香港開市，顯然就無咁興奮。恒指高開後略回，下午個市仲愈嚟愈無力，散戶主要活動都係打游擊。點解出現呢個現象呢？一個理由係臨近半年結，今年內地管理層吸收咗經驗，一早打開口牌話估計唔會出現錢荒，雖然管理層派咗定心丸，但內地銀根點都係緊緊地，炒家當然唔會隨便重兵出擊；再者，有大量新股上市，分散部份市場注意力，唔少股民轉轉口味打吓新。
照家咁睇，大戶似乎同歐洲球隊去南美踢世界盃一樣，見到天氣咁熱，梗係懶得就懶，慳番啲力。好似西班牙咁，大部份主力在國內打聯賽本來已經爭到頭崩額裂，跟住西甲兩支強隊仲齊齊打埋入歐聯決賽，然後去巴西打世界盃，係無得留力兼酷熱天氣下，幾好波都死啦，結果初賽就已經畀人踢出局！
炒股同踢波一樣，家唔係大牛市，唔再係通街平錢亂買嘢，大戶粒粒子彈都要好好運用，呢排個市無乜大消息，佢哋咪係中場搓吓波先，但唔排除去到接近九十分鐘，佢先會一輪快速反擊，夾死散戶都唔奇！小心近月尾大市個勢轉急喎。
散戶打新眼花繚亂
由於上海同業拆息再升，加上內地新股重啟，上證指數應聲挫1.6%，累恒生指數四連跌，報收23168，跌14點。瑞銀因銷售及價格疲弱，降多隻內房股評級，內房股捱沽。中國海外(688) 跌2.6%。
散戶打游擊戰，部份轉移戰場去打新，昨日兩隻新股掛牌，內地中小企業融資供應商瀚華金控(3903) 首掛，收報1.63元，最高曾造1.67元，低見1.62元，每手賺20元咁大把。綠色動力環保(1330) 首掛，午後一度高見3.96元飆15%，收報3.77元，高招股價9%，每手不計手續費賺320元，喺咁多隻新股下，有胡即食照計無壞。
未掛牌的新股方面，今日首掛的內地最大潤滑油添加劑生產商天合化工(1619) 在暗盤市場新報1.9元，較招股價1.8元高6%。市場消息話，剛截止申請的軟件股暢捷通(1588) 及恒發洋參(911) 比較熱，市場消息話暢捷通公開發售部份獲得高達200倍超額認購，照計有得炒吓。仍招緊股花樣年(1777) 分拆出來的彩生活(1778) 孖展截止，據報國際配售獲3倍超額認購，公開發售同樣獲超額認購，睇嚟熱度有限。打新打到眼花繚亂，實用策略係揀熱門概念買少少，博飲餐茶穩陣過大大棍扑落去。
另外本港中式飲品製造商鴻福堂(1446) 舉行上市投資者推介會，市場消息指國際配售部份已足額。公司計劃下周一(23日)起招股，招股價介乎1元至1.3元，入場費約2600元。
陸羽仁
金融High Tea 舊文
