智取大市：高追強股限注碼
■績優股能夠喺經濟放緩之下進行產業升級，好似吉利就係典型例子。 資料圖片
上一期講到，年初至今只有少數股升、多數股跌，當中有本事能升一倍嘅二、三線股，都係績優股為主，能夠喺經濟放緩之下進行產業升級，好似吉利（175）就係典型例子。
強勢股其中一個特徵，就係連
升、慢升，途中甚少大幅回吐，一旦發現有資金開始追捧嘅新績優股，見輕微回吐理論上已可買，之但係面對目前港股隨時見頂嘅風險，為確保輸極有譜，分注逢高買係較保險做法。連強勢股都唔買的話，萬一心儀績優股爆上就喊都無謂，始終績優股供應唔多，買一隻少一隻，要好好珍惜。
之前推介過嘅中航信（696）就係一例，上星期五公佈業績，星期一因市況不就，所以當日高開後炒唔起，去到星期二市況好轉隨即炒上，升夠一成。如果星期三有回吐，仲可以第一注幫襯嚇。
瑞聲（2018）同舜宇（2382）波幅進一步擴大，當然難以確定幾時見頂，但波幅擴大係升勢末段嘅徵兆，所以潛在跌幅亦係唔講得笑。低風險、高回報，已經唔係港股升咗幾個月嘅時候會出現，所以整體入市注碼反而係要比之前減少先啱，而唔係一見好炒就雄心加注。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
