油服股炒味濃
2016年10月05日
英國拋出脫歐時間表，英鎊匯價探底，首相文翠珊放出消息，話喺過程中唔會特別保護金融界利益，雖然係咁講，但滙控(005) 股價依然企穩，無受影響。
英國脫歐事在必行，文翠珊話明年3月前會郁手，呢樣嘢其實係預期之內，因為你唔郁手，歐盟都會郁手，既
然係咁，不如自行揀日子了斷。
德國在明年5月大選，德國總理默克爾都幾危，文翠姍在德國大選前夕開始退歐，就係賭默克爾唔敢玩咁盡，歐洲對英國封閉市場自己都傷，文翠珊揀呢個日子出手都幾辣。
英國準備脫歐，為了緩和過程中嘅陣痛，財政部將會為在脫歐前取得的所有歐盟融資提供擔保。外界估計英國央行會盡量放鬆貨幣政策，甚至大力印鈔，因此拋售英鎊，英鎊兌美元低見1.2778，跌幅0.5%，是1985年6月以來最低。兌港元跌至9.975水平，係31年新低。英鎊匯價下跌，大大有利出口，金融時報指數昨日開市再度升穿7000點大關。英國脫歐匯價大跌，順便幫埋出口經濟，都算係有一失卻有一得喎。
脫歐啟動 滙控照升
英國要上路，財政大臣夏文達坦言，脫歐過程複雜，需要縝密規劃，外電就爆料，話首相已拒絕把維護金融利益放喺優先地位，強調唔會高估金融界對經濟嘅貢獻。
中環茶友笑言，喺脫歐公投文翠珊以低調策略，冷手執個熱煎堆，取代積極推動脫歐嘅約翰遜入主唐寧街十號，足見佢深謀遠慮。英國選民支持脫歐，好明顯係唔buy包括金融界在內嘅既得利益集團，所以英國高調話唔想保護金融界利益，好似好順從民意，但政客講嘢十居其九口不對心，以文翠珊的水平，更加係信佢一成都死。講到底，英國金融業要頂住呢一浪，點都要靠自己硬功夫，畢竟全球金融業仲係歐美英語世界執牛耳，加上美國佬大力整治德銀，所以英國銀行要自己執生，不過鎊價下跌但實體經濟好轉，加上股市衝高，都有利滙控。
德銀問題暫時平靜，英國脫歐無影響股市，午後恒指回升，收市前升幅擴大，以全日最高位收市。恒指收報23689點，上漲105點，國企指數收報9756點，升73點，成交仲係好奀，只得498億元。
英股向好，滙控都升左1.2%，報58.75元。中國恒大(3333) 宣佈重組地產業務，出售相關資產予深深房，變相將中國房地產業務借殼內地A股上市，摩根大通質疑恒大重組可行性，維持「減持」評級，不過恒大股價一向和大行唱淡背道而馳，昨日大升逾8%，報5.67元。
冠軍小股東等到炒番轉
呢排油價好番，油田服務股槓桿效應仲大，熱錢即刻落鑊急炒，華油能源(1251) 飆升17%，報0.68元；百勤油服(2178) 揚26%，報0.48元；安東油田服務(3337) 升26%，報0.92元；巨濤海洋石油(3303) 升18%，報0.73元。另外，宏華(196) 升11%，報0.61元；海隆控股(1623) 炒高13%，造1.42元。
龍頭油股低吸係長線投資，油服股喺行業減少投資下跌到死死吓，佢地風險大過龍頭股好多，同樣投機味重，總之快上快落，唔可以話玩唔過，但就風險同回報都係一樣咁高。
冠軍科技(092) 股權宣佈易手後，主要股東程楊已獲委任為執行董事及董事會主席，佢嘅股價繼續走高，收報0.193元，升20%，同系嘅看通(1059) 都升，收報0.94元，升17.5%。睇嚟小股東死守咁耐，O依家都跟住新老闆等炒一轉。
陸羽仁
金融High Tea 舊文
來源 source: http://hdfin.stheadline.com
