搞科網股何妨大包圍
2017年11月10日
騰訊(700) 近日不斷出擊，一方面不斷分拆關連企業上市；一方面就出手收購，最新一項大動作係收購臉書(facebook)勁敵Snapchat 12%股權，成為Snapchat無投票權嘅A股主要股東。以Snapchat最新股價13.29美元推算，騰訊手上股份總值19.4
億美元，相當於151億港元。
Snapchat用同股不同權制度，95%投票權牢牢掌握喺創辦人手上，騰訊購入嘅A股冇投票權。Snapchat舊年喺美國上市後業績一直唔靚仔，第三季虧損按年擴大2.56倍，至4.43億美元(約34.6億港元)；期內營業額雖按年升62%，仍然差過分析師預期嘅2.369億美元。Snapchat上季每日活躍用戶僅1.78億，按年增17%，但低過預期嘅1.818億。消息一度令Snapchat股價喺周二市後跌逾兩成，靠騰訊入股嘅消息先至企番穩。
Snapchat閱後即焚功能，成功吸引大批唔想畀人知道佢地喺網上講過乜嘅年輕人使用，形成臉書嘅用家年齡較大，年輕少少用Instagram，再後生啲用Snapchat嘅格局，Snapchat曾經被視為臉書最大威脅。臉書諗過用佢一向慣技，掟錢買起對手，但就畀Snapchat拒絕，仲自行喺美國上市。但喺上市後，一直畀人批評無法將用家變成收入來源，令股價受壓，加上臉書推出相近用後即焚功能，令Snapchat前景蒙上陰影。呢次騰訊趁低價買入Snapchat 12%股權，似乎係想冷手執個熱煎堆。由於騰訊主席馬化騰被視為好有商業頭腦，此舉同時令人對Snapchat前景改觀。
騰訊大把錢豪買Snap
o依家美國科網界基本上由谷歌、臉書、蘋果、亞馬遜、微軟五間巨企盡佔鰲頭，而谷歌同臉書除左用本身已有市場優勢，仲憑藉雄厚財力買起其他疑似有潛力挑戰佢地地位嘅新晉公司，實行大包圍買起大部份。而喺中國市場，阿里巴巴、騰訊同百度號稱BAT三大巨頭，當中尤以阿里同騰訊優勢特別明顯。o依家騰訊一方面分拆關連企業吸資，另一方面用無比財力作策略性收購，估計未來佢會繼續用呢個方法，擴大喺中國以外市場影響力，對騰訊嚟講，佢手頭大把現金，投資左好似Snapchat呢啲公司，可以同佢傾合作搞嘢，甚至好似臉書買左WhatsApp咁，當收多件武器傍身，唔賺錢都冇所謂。呢個手法喺商業上既聰明又霸道，可以話用盡資本市場帶畀科網巨企嘅財務優勢，可以話「搞科網股何妨大包圍」。
騰訊喺市場呼風喚雨，佢旗下隻新股閱文(772) 首日股價一度翻倍，成為紅底股，令新股熱升溫得更緊要，閱文噚日收升1.6%，報104元。閱文上市靚仔，帶動更多資金流入同樣由騰訊持股嘅新經濟股易鑫(2858) ，該股又係爆晒飛，外電引述知情人士透露，易鑫集團對潛在投資者話，擬將香港首次公開募股發行價定喺每股7.7港元招股區間高位。按招股區間高位定價，IPO規模將達到68億元。
另一隻已截止招股嘅雷蛇(1337) ，市場傳聞公開發售部份凍資逾一千二百億元以上，超購迫近三百倍，有近二十二萬人認購，認購一手有約三點七萬人，中籤率為百分之五十，遠較閱文的百分之七點七為高，抽二十五手(十點一萬元)先穩獲一手。頂頭槌飛錄得一百一十二張，中籤率約為百分之一點二七，最多可分到六十七點五萬股。有傳連恒地(012) 主席李兆基都加入玩新股呢個遊戲，有份走去認購吓雷蛇。散戶炒科網新股，一樣可以包圍，隻隻有實力嘅都去認購下。
冷門新股變左私房菜
喺新股熱瀰漫下，唔止大股炒得勁，噚日喺主板掛牌嘅普天通信(1720) 都有份炒高，開市就炒升近倍，收報1.46元，較招股價升1.2倍。普天通信大炒事前冇路捉，但首掛前已露手影，佢超額僅得10倍，但一手散戶分貨少，一手中籤比率只有7.5%，申請15手可穩獲1手，擺明係唔畀咁多貨散戶，加上集資額少，流通量唔多，自然一撩就上。散戶炒呢啲股，風險係佢想炒就唔會畀貨街外，但如果你大手申請，隨時就中到一手都係，到時一破底就損晒手，所以呢啲錢唔同啲熱門大戶有得抽吓獎，並非普通散戶隨隨便便可以執到。
至於今日又有新股掛牌，中港代理樂高嘅玩具公司凱知樂(2122) 上市前夕，暗盤價早段走高，初段曾報2.56元，較招股價1.55元高出65%。凱知樂因為唔係科網概念，所以都係得11倍超購認購，公司按每股1.55元定價，接近招股價每股1.5元至2.2元下限，集資淨額約2.81億元，但佢一手2000股中籤率僅得5%，認購25手先穩獲一手，甚有收埋嚟玩食私房菜之感。
新股令港股氣升溫，恒指一舉升上29000關，收報29136，急升228點；國企指數收報11744，漲168點，成交1145億元。騰訊(700) 繼續係交投最多股份，收報387.8元，升0.57%。
陸羽仁
金融High Tea 舊文
來源 source: http://hdfin.stheadline.com
