金手指：重注買俄鋁博解禁
■俄鋁對上幾個交易日異動，可能係香港圍內炒友自己衝入去。 資料圖片
特朗普喺芬蘭見普京，烏克蘭、敘利亞等，都一定會喺議程上。對我哋香港股民來講，最切身莫過於究竟花旗國政府對俄鋁（486）嘅制裁，會否撤銷。
孫柏文唔知特朗普啲幕僚有冇偷雞買貨，不過對上幾個交易
日，俄鋁確實升咗一成幾。當然，呢個升幅可能係因我哋香港圍內嘅炒友，自己懶醒咁衝咗入去。博嚇高峯會後有個蜜月期，炒一轉。
你知啦，就算一國兩制話到明我哋冇得管外交，都唔知點解好多香港人都喺大學狗衝咁讀「國際關係」。可能讀書千日，用在一trade啩？
花旗國政府，其實由佢哋喺四月宣佈話會制裁俄鋁後，已經兩次推遲落實日。根據我嘅明查暗訪，我一路都見佢哋冇停過產。喺上周，佢哋亦公佈咗近月啲出貨數字，肯定咗我啲消息。
咁喺現價買唔買？對上一次宣佈嘅制裁大限，將會喺八月初。我深信，生路，就一定放，只係幾時。計落就應該係差不多𠵱家，七月中買貨博解禁消息。對上兩次限期我都係咁諗，不過就冇解決，拖又拖。所以今轉你買，可能會又因延長落實限期，冇升跌。
我自己已落重注，平均價同現價差不多。繼續睇吧。提一提大家，啲膽小如鼠嘅銀行，冇得買俄鋁，所以要入貨，就要幫親啲本地行。特朗普不但推翻國際秩序，連香港股民買賣股票嘅習慣都改埋，真係利害。
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.finance.appledaily.com
