大棋局 - Mr. Tregunter 2019年12月10日
【大棋局】中美貿易協議藏暗手 - Mr. Tregunter
特朗普要嘅協議，係一份簽完你會跟嘅有效協議；中共要嘅協議，係一份不精確有轉圜餘地嘅協議。 資料圖片 適中字型 較大字型
下星期15日，係中美貿易戰新一輪關稅死線。聯儲局本年最後一次議息亦喺下星期，鮑威爾上月表示近期應該唔會鬱利率，所以市場冇人理議息，集中睇下星期加關稅定貿易戰有轉機。
美國原定本月15日，對總值1,560億元（美元．下同）中國商品加徵15%關稅，但特朗普近日表示可能有變。中國方面亦「扮」釋出善意，中國國務院關稅稅則委員會計劃取消部份美國進口大豆和豬肉關稅，但強調三點，企業自主商談、自行進口、自負盈虧。係咪似曾相識？近半年香港反送中事件中共亦用類似手法，口講維持一國兩制，支持特區政府，即係發生乜事係港共問題，唔係中共問題。企業自主買唔買美國農產品，係企業問題，唔係中共問題。
所以《華爾街日報》有報道指，特朗普希望中方簽完第一階段貿易協議一年內，向美國購買400至500億元農產品，美方亦要求中方承諾無論市場有乜變動，都會履行上述購買承諾。特朗普認為中共會走數，以市場自主做擋箭牌，協議隨時係廢嘅。
中共但求靈活方便走數
特朗普要嘅協議，係一份簽完你會跟嘅有效協議；中共要嘅協議，係一份不精確有轉圜餘地嘅協議，是否不平等非主要考量，隨時可以有位走唔遵守先係主要考量。原因只有一個，若時勢所逼不得不簽，就要留缺口畀自己，所以從來冇諗過跟足。好似一國兩制香港高度自治，高度即係幾多？最終達致普選，最終即係幾時？全部隨佢講。
至於中國向美國購買400至500億元農產品，有兩點要注意。其一，此數原為劉鶴提出，即中共計過數頂得順。《華爾街日報》報道此數去年為86億，500億乍看好多，其實2017年中國對美國入口240億元農產品，去年因打緊貿易戰先特別低。2017及2018年中國進口全球農產品總額分別為1,247億及1,367億元，所以中美協議就算簽500億元，中國都可以加減他國來應付。
其二，做廠朋友容易意會，最怕係做大間廠後斷單。中國突然向美國加倍買農產品，美國要提高產量，要計到數就要定單穩定。定單如果可以不穩定，其實就係埋下暗手為他日反制作準備。共產黨不會乖乖地簽下並遵守協議。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.entertainment.appledaily.com
