實體零售業近年俾網購蠶食，經營大潤發嘅高鑫零售（6808）依然屹立不倒。
重點係，佢有阿里巴巴（9988）入股，好處係喺網購領域同阿里有crossover。業績公
告提到，其O2O業務初具雛形，新銷售模式包括「貓超共享庫存」、「社區團購」同中小型超市。壞處係，阿里介入之下，以後高鑫就冇縱向或者橫向擴展新業務嘅機會，以後只能喺現存領域之下安分守己去發展。
高鑫畀人嘅感覺，更似一間麥當勞同3M之類嘅企業，行業成熟而業務優質，尤其喺阿里扶助之下，高鑫係十年後都存在嘅公司。
收入始終跟隨經濟上落，隨住經營效率遠勝同業，高鑫未來仍能擴大利潤率，以及搶佔市佔率。你見高鑫舊年收入倒退4%，盈利仍能增長14%。除非中國爆煲，或者經濟出現長期衰退，否則高鑫前景仍然不錯，市盈率32倍確係貴，今時今日有質素嘅有邊隻唔貴？但絕對係中國股票裏面，少數有質素又穩健嘅股份。如果要一個平穩增長股票組合，可以有埋佢。
高鑫市值千億，佢被迫安分守己嘅缺點，正正係美團（3690）嘅優點，後者有縱向橫向破壞式擴充能力。中共中央政治局上星期五會議講到首先恢復交通運輸，睇嚟公共交通必然跟風恢復，美團將進一步擺脫疫情受累行列。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com
