操盤手劄記│各地爭推穩定幣 槪念股穩唔穩陣？（割柑人）
操盤手劄記│各地爭推穩定幣 槪念股穩唔穩陣？（割柑人）
Getty Images
近日花生指數最高嘅事件，莫過於特朗普（Donald Trump）、馬斯克（Elon Musk）反面！一個係全球最大經濟體美國嘅總統，一個係全球首富，曾經自稱係Trump「第一老友」（first buddy）嘅Musk，因為不滿Trump嘅減稅赤字預算案《大而美法案》（One Big Beautiful Bill Act），斥之「令人作嘔」（disgusting abomination），Trump反斥Musk「癲咗」（went CRAZY）；Trump威脅撤銷Musk旗下公司嘅政府合約，「制裁」佢，Musk則威脅將旗下SpaceX為政府服役嘅Dragon spacecraft退役，「反制」佢，但之後改口唔會退役，惟對網友「特朗普應被彈劾」嘅貼文回應「係啊」。
美股外幣即時報價 多國新聞任睇
美國藉穩定幣 創造美債需求
Musk此前領導嘅政府效率部（DOGE）旨在削減政府開支，但Trump嘅減稅法案卻令稅收大減、赤字大增，Musk認為會令美國公民背負難以承受嘅債務負擔。據無黨派嘅國會預算辦公室（CBO）預測，該法案未來10年將令赤字增加2.4萬億美元；另據無黨派嘅聯邦預算責任委員會（CRFB）預測，未來10年政府利息支出將由3萬億美元增至5萬億美元。Trump唔會唔知美國債務沉重，以現時美國國債達36.2萬億美元計，每日利息達27億美元，點應付？睇參議院近日舉動，似乎想藉穩定幣嘅發行嚟應付。
喺中國、俄羅斯、沙特等國減持美國國債，市場對美債、美元信心動搖之際，美國參議院喺5月19日通過《指導與建立美國穩定幣國家創新法案》（GENIUS）。穩定幣係同穩定資產掛鈎嘅加密貨幣，可用於資產交易、零售支付、跨境支付等，而其基於區塊鏈技術嘅網絡，喺處理跨境轉帳時比傳統SWIFT系統更快。美國試圖透過監管穩定幣，要求發行商每發行1美元穩定幣須以1美元或等值資產如美債作儲備，藉此創造美債需求，鞏固美元地位。呢一著嘅妙處，係唔使印銀紙，新嘅穩定幣需求嚟自外地或本地投資者，唔會造成美國通脹；而且美債需求增加，亦使債息降低。
非洲商人找數 繞過外滙管制
繼美國之後，5月20日南韓總統候選人李在明（6月4日勝選）提出發行同韓元掛鈎嘅穩定幣方案，以遏制資本外流同增強金融自主權；5月21日香港立法會亦通過《穩定幣條例》，成為中國唯一有相關法例嘅地區。香港發展穩定幣，背後估計有阿爺點頭。喺人民幣受外滙管制，未能自由兌換下，內地企業透過香港發行同人民幣掛鈎嘅穩定幣，用於跨境貿易同投資，既可推動人民幣國際化，亦可作為SWIFT嘅替代。現時數碼金融發展最快嘅地區係非洲，原因之一就係非洲多國實施外滙管制，例如尼日利亞，於是入口商透過穩定幣支付國際貨款，規避銀行渠道嘅滙管。
上周四，「穩定幣第一股」USDC發行商Circle（CRCL）喺美國紐約交易所上市，首日升1.7倍，翌日再升29.4%，兩日累升2.5倍。目前全球最大規模嘅穩定幣係Tether發行嘅USDT，佔穩定幣市場61%，Circle發行嘅USDC次之，佔29%。香港有冇槪念股？有，例如有投資Circle嘅光大控股（165）同華興資本（1911）、為穩定幣發行商提供儲備服務嘅眾安在綫（6060）、拓展穩定幣跨境支付嘅連連數字（2598）、入選香港金管局首批「穩定幣沙盒」嘅京東集團（9618）。不過，上述5隻槪念股喺日前炒高後，上周五分別回吐17.2%、2.1%、8.9%、10%、1.5%。現時穩定幣槪念股炒味頗濃，只宜小注怡情。
割柑人
www.fb.com/hkstockpicker
本欄隔周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
