笑到最後｜的士業應推冇禮貌運動（高明）
笑到最後｜的士業應推冇禮貌運動（高明）
報道指出，的士業界推行禮貌活動，為期三個月，三大重點：不拒載、不揀客、不濫收車資。喺舊世界嚟
講，應該係一個幾好嘅運動，亦都算係釋出善意，改善服務。但係，世界已經變咗，禮貌再唔係人類嘅優勢，如果真係做到上述三點，人類的士司機更加冇生存價值。
美股外幣即時報價 多國新聞任睇
自動駕駛系統 將會大規模取代人類司機
所有用過ChatGPT為首嘅大型語言模型人工智能嘅人都知道，AI就最有禮貌，過去半年ChatGPT甚至加入擦鞋功能，無論你講咩，佢第一句覆你都話：你講得好啱呀，完全觸摸到人性嘅弱點，就係「X生好嘢」，基於大部份使用AI嘅人都係使用月費制度，對於AI嚟講等於出份糧打份工，佢擦鞋冇乜成本保住份工，喺呢方面模擬人類都算做得幾接近。
正如之前幾個禮拜反覆講過，已經出現嘅自動駕駛系統，將會大規模咁取代人類司機。不論最後係行光達定係鏡頭，車廂一定會載有人工智能，基本三大優勢：禮貌、擦鞋、me time，人類司機一定比唔上，上述所講嘅禮貌運動不拒載、不揀客、不濫收車資，假設未來係Tesla（TSLA）模式，車主買車，放部Cybercab喺街自己碌兜客，車主自己吃喝玩樂嘅時候，係冇可能微觀管理邊個客樣衰唔載、近距離唔載、遠程又唔載、過海又唔載、唔小心比西客上咗就黑佢面。電力嘅成本遠低於入油或天然氣，車主寧願由/I自動導航，兜多兩轉收錢。
唯一有機會揀客就係行Waymo高精密地圖模式，地圖未畫好，覆蓋唔到，要跨區去太遠真係搞唔掂。但係都係非戰之罪。
至於濫收車資，Waymo模式已經證實咗，唔使俾貼士係好多人揀Waymo唔揀Uber嘅主要原因之一，即使咪錶價Waymo貴啲，香港情況就係零頭唔找。如果的士業界打算用呢三大重點不拒載、不揀客、不濫收車資招徠乘客，客觀證實自動駕駛基本嘢已經好過人類。更加唔好講一個司機揸車嘅時候同時睇八部電話係咪安全過人工智能駕駛。
食完趕客走 反而吸引顧客慕名而來
禮貌運動只會加速人類的士司機被淘汰，參考香港飲食業嘅先例，好多做得水平麻麻地嘅餐廳，靠嘅就係冇禮貌、食完趕客走，某一啲食客會將以上舉動視為風格，慕名而來，亦都會吸引一啲人獵奇，製造本來冇嘅需求。就算係運輸業嘅例子，曾經紅極一時嘅亡命飛Van，上車嘅乘客雖然有覺悟，但係20分鐘尖沙咀去元朗又真係幾吸引。
所以的士業界救亡，更大嘅畫面，應該推冇禮貌運動，始終要生意所以都不能揀客，喺唔揀客嘅前題，做到黑面、趕客落車、特急，或者係未來都仲可以殺出一條人類血路。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
