投資的天空：市淡換馬好時機 - 張士佳
早前市場上出現不少指大市正托著來沽貨的聲音，單以市況來說，可以話係無錯，縱使指數前日再破頂，但不少個股都未能回復先前高位，若只?股票，近日個倉唔好話創新高，若然無點跌過，都已經非常出色，昨日又是另一市比股強的日子，最近揀股認真考功夫。
筆者先前在股票策略上保持審慎保守，只係根據自己的交易系統，以及見市場人士頗多看調整的情況下拗嚇頸，博了衍生工具好倉，現時算係有點著數，本身首個目標是24100，不過，前日期指掂一掂24000後，就即市回調近200點收市。
唔信美國咁快退市
衍生工具靠槓桿，最怕無動力，尤其係見到這種虎頭蛇尾的情形，所以昨日自己已減持了大部份好倉，暫留一點睇長少少。整體個股最近一直跑輸，加上假期漸近，投資者?貨的意欲都有所下降，但筆者反而認為，是換入股票的時機，當然，唔會立刻一下子買曬，反正氣氛淡靜了，大可以慢慢選擇。
外圍方面，美股終因第四季經濟意外收縮，而出現輕微調整，是自2009年第二季以來首次出現收縮，數字令不少人跌眼鏡，但對股市的影響卻很輕微，道理很簡單，因為市場一直有人怕美國的退市步伐會比預期早，既然當地在經濟復蘇路上仍然不穩定，大家反而冇咁驚。
老實說，我都唔係好明，點解有人覺得美國會好快退市，照計就算唔睇昨日的據，之前的都反映經濟情況唔係太穩定，加上政府沉醉於量化寬鬆創造出來的繁榮(至少股市係)咁耐，如果把握唔夠，應該唔夠膽貿然退市，我暫時真係唔多信美國會提早收水。
張士佳
元大寶來證券(香港)業務及商品發展總監
與曾卓鋒(元大寶來證券(香港)客戶經理)聯合執筆
(逢周三、五刊出)
上一則: 青心直說：阿里巴巴有秘密 - 胡孟青
下一則: 炒友Blog：中興今年可恢復盈利 - 邱古奇
投資的天空 - 張士佳 舊文
