等股價跌成地底泥
2017年04月20日
英國首相文翠姍宣佈提前大選搞低咗英國股市，令上日港股受壓，港股昨日開市承接外圍跌勢，最多跌200點，但跌到早上10點幾就差不多，跟住唔理內地跌市，港股從低位炒吓反彈，收市跌98點，收報23825點，唔好覺得個市好強，感覺上反彈亦欠力水。
「蘿蔔章」就咁唔見30億
內地A股繼續玩監管風暴，昨日跌多0.8%，連跌4日累挫3.2%；內地今年都係玩監管年，要整治好成個金融體系，經濟上去槓桿，政治上掃清前朝餘黨，所以唔係大炒格局，但亦唔會俾佢好衰。
好似近日A股跌得多啲，外電就引述接近人民銀行權威人士透露，最近中銀監金融監管政策措施不斷，市場出現較明顯的反應，央行不希望這種局面持續，會適時微調貨幣環境，穩住市場情緒，為去槓桿創造空間。人行講起就做，昨日在公開市場進行800億元逆回購操作(即放水)，公開市場單日淨投放600億元。一路放水，一路加強監管，照計內地個市都唔會無底大跌。
內地有時啲嘢又真係好誇張，又有內地銀行傳出「蘿蔔章」(即假印章)醜聞。民生銀行(1988) 有人涉嫌利用私刻的公章，在某企業客戶的商業票據上，蓋上假章，令該票據不斷轉貼現，直到兌付時刻，才被發現公章為假造。
涉事的民生銀行北京分行航天橋支行負責人，為了掩飾那30億元的票據大黑洞，向150名客戶出售虛構的投資產品，並聲稱該產品保本保息，訛稱原投資者急於回款，所以放棄利息，而且1年期產品年利率達4.2厘，半年期更高達8.4厘，不少投資者被這種所謂「飛單」的高息產品吸引中招。
內航股衰升得多
民行北京分行確認，航天橋支行行長張穎正接受警方調查，支行副行長肖野則失聯。「肖野哥」個名改得唔好，成個航天橋支行都死得要「燒嘢」啦。受「蘿蔔章」事件影響，民生銀行(1988) 股價再跌1.5%，收7.78元。民行去年純利478億，搞出「蘿蔔章」，自然要賠錢俾客戶，佢輸30億本來死唔到人，但投資者唔知佢仲有無其他「蘿蔔章」事件，自然唔客氣沽你先。
經紀張喜歡執平貨，問民行買唔買得過，我本身唔係咁鍾意民行的作風和管理，同佢話「你要買平貨，可以等佢跌深啲先，而家7.78元，去番7元呢啲一年低位至吼，就安全少少，跌番去一啲地底泥價錢至買，風險無咁大。唔好忘記佢去年2月見過6.1元，而家買風險高咗啲。」
昨日急升的大股有瑞聲(2018) ，急跌的大股有內地航空股，如國航(753) 就跌3.3%，皆因摩根士丹利發表報告睇淡內地航空股，把三大中資航空股評級由「與大市同步」，下調至「減持」。大摩調降評的理由是考慮到燃油價格上升壓力、機場收費上調和人民幣可能貶值的因素，中國的航空公司今年將難以實現利潤增長，認為市場遠未反映出上述利潤風險。大摩將東航(00670) 目標價由3.83元降至3.62元(現價4.19元)；南航(1055) 目標價由4.5元降至4.47元(現價5.13元)。國航目標價則由5.35元上調至5.79元(現價6.46元)。
大摩亦調整了國泰航空(00293) 目標價，由9.43元上調至11.63元(現價10.86元)，認為國泰的盈利周期可能已在2016年見底。
其實客觀點講，三隻內地航空股PE由9倍幾到11倍幾，PE唔算貴，單以PE計，未來盈利持平都唔係咁衰。大摩咁建議，睇嚟背後的原因，係內航股已升得多，如果大市係上落市，咁都係時候要回。從呢個角度睇我都同意，以國航為例，年頭低位4.89元，而家回吐咗都仲升咗32%，未來還有回落空間，做乜唔沽吓先，等佢下次再跌到殘再買呢？
陸羽仁
金融High Tea 舊文
來源 source: http://hdfin.stheadline.com
