操盤手劄記│大戰當前 投資者需否走難？（割柑人）
操盤手劄記│大戰當前 投資者需否走難？（割柑人）
向來被視為「世界火藥庫」嘅中東，近日又硝煙
彌漫，自6月13日以色列突襲伊朗核武研製設施，至今已過十日，會否演變成「第七次中東大戰」（此前六次為1948年以色列獨立戰爭、1956年蘇彝士運河危機、1967年六日戰爭、1973贖罪日戰爭、1982年黎巴嫩戰爭、2023年加沙戰爭），甚至「第三次世界大戰」？執筆之時，最新情勢係美國總統特朗普宣布美軍已成功完成攻擊伊朗三個核設施；伊朗會否搵盟友俄羅斯、中國支援未知。大戰當前，投資者使唔使走難？
美股外幣即時報價 多國新聞任睇
霍爾木茲海峽 難以長期封鎖
投資者驚乜？驚伊朗封鎖霍爾木茲海峽、驚油價上漲、驚通貨膨脹、驚減息無望、驚股市崩塌⋯⋯惟驚魂甫定，理性啲諗，雖然霍爾木茲海峽係全球石油運輸嘅咽喉要道，平均每日2,000萬桶石油通過，相當於全球石油液體消耗量約20%，但正因如此，如果伊朗封鎖該海峽，各國尤其係其他中東產油國，一定聯手反制，美國同盟友亦會迅速以軍事行動重開航道；而且，伊朗本身都有80%石油出口依賴該海峽，封鎖於己不利。投資者毋須過慮，做好風險管理就好。
幾次中東大戰，都係以色列復國後同埃及、敘利亞、約旦、黎巴嫩、伊拉克等周圍阿拉伯國家打嘅仗，以色列受襲反擊居多；今次以伊開戰，則源於國際原子能機構（IAEA）事隔20年再度指控伊朗違反核不擴散義務，以色列認為對其構成威脅。以伊兩國恩怨情仇，可追溯至兩國前世今生。話說公元前1000年雅利安人遷徙至伊朗，係波斯人嘅祖先；公元前722年以色列北國被阿述所滅、公元前586年南國被巴比倫所滅，以色列人被擄為奴；公元前538年，波斯攻佔巴比倫，並統治以色列人，但允許佢哋返回耶路撒冷重建聖殿，可謂有怨有恩。
趁有換滙優惠 可做Carry Trade
言歸正傳，以伊戰火未熄，以色列更警告可能要打「持久戰」。戰局未明朗，加上美國聯儲局議息後再度凍息兼言論偏鷹，限制美元跌幅，上周五美滙指數靠穩，報98.77；港元滙價則再度跌至7.85兌1美元嘅弱方兌換保證水平，引發市場對金管局可能出手支撐港元嘅揣測，事實上，隨著美國參戰，港滙喺部分交易平台更已跌穿7.85。息口方面，港元息率低企，1個月、3個月HIBOR分別低見0.53厘、1.51厘；相對上，美元息率仍高，1個月、3個月SOFR都持續企於4.32厘左右。
港美滙率利率差別，難免引發利差交易（Carry Trade），即於低利率地方借錢，換成高利率地方嘅貨幣後出貨，賺取利差。Carry Trade唔係大戶先做得，散戶亦做得。筆者近日發現，某中資銀行每兌換1,500美元有1%即15美元優惠，最多可兌12,000美元，雖然該行滙價要成7.866，但如果即刻兌返港元7.833，咁120美元扣減所蝕滙價約400港元，都有逾500港元賺。除非金管局突然出手沽美元買港元，否則1% buffer應該幾安全。惟要注意嘅係，該優惠只限喺4月、5月並無享用外滙優惠嘅客戶；另外，不可買美元後即日賣出，隔日就得，但可轉到其他人戶口或用支票轉走。該優惠本月30日截止，換滙所贈美元會喺9月30日前存入戶口。
割柑人
www.fb.com/hkstockpicker
本欄隔周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
