大師冇點你│香港搞奧運，有冇得諗？（李聲揚）
大師冇點你│香港搞奧運，有冇得諗？（李聲揚）
但似乎係有得諗的。啟德個新場唔少人去過，我都去過
，絶大多數人都有讚無彈，唔好嘥咗佢。至於財政負擔，應該唔使太擔心嘅。
美股外幣即時報價 多國新聞任睇
港主辦奧運，得唔得？實情奧運向來由單一城市舉辦，唔少冇香港咁出名嘅城市都申辦或舉辦過。名古屋都申辦啦，香港為何不能？至於對運動員或各樣項目嘅支持，一樣唔使擔心。
不過香港一個問題，係地方細。唔少人口少過香港嘅城市都申辦或主辦奧運，但計面積就大過香港。以香港咁細面積，主辦奧運的確係個問題。點搞個奧運村已經係問題（雖然有人話可以搵啲冇人買嘅樓盤嚟安置運動員），而且香港亦都似乎冇咁多場館，政府財赤，總冇理由再呢啲時間起一堆新場館。
所以新民黨提議，係同大灣區其他城市一齊搞，聽落正路。場館方面，香港有啟德，大灣區城市亦有其他場館，可以幫輕下，選手村嘅問題應該都解決到。況且，內地主辦過北京奧運，廣洲亦主辦過亞運，有唔少經驗可以分享。廣東澳門同香港亦會合辦全運會，大把交流。
不過如果係「大灣區奧運」，又會有其他問題。幾個城市合辦奧運，史上好似未見過。最大問題當然係交通。場館可以分開不同地方，但選手村呢？分開幾個，史上應該未見過。如果只係一個，往返唔同場地嘅時間，可能都比較耐，就睇有心人點安排，但我估解決到？
有人擔心財政問題，擔心會「蝕錢」，影響財赤。我諗呢個就未必要太擔心，首先搞得嚟都2036，財赤問題怕且都解決咗啩。二來，同大灣區城市一齊辦，就唔使起好多新場館，大大減低開支。三來最重要嘅係，奧運蝕錢賺錢，其實好睇你點計。有幾屆當然係相當災難，但即使話賺錢嘅，可能都係數字遊戲。就咁睇數字，多數奧運可能蝕錢。但睇事情不能咁表面，奧運唔止係帶動嗰一轉遊客，唔係為咁短日子做咁多嘢，而係成個城市嘅國際形象。近年都話香港國際形象低落，要說好香港故事，有份搞奧運，會係個好機會。
順手一講，奧運就一個城市舉辦，但世界盃就往往成個國家，唔同城市（而家幾國合辦都好常見）。申辦完奧運，不如就申辦埋世界盃。到時一定唔會只係香港，會係全國，但香港做其中一個城市，甚至申請辦開幕禮（決賽怕且就會在北京），都係好事。有咗奧運經驗後辦世界盃又得，唔搞奧運會，直接中國申辦世界盃亦得。
李聲揚
前大行分析員，如今無業遊民，別人恐懼時我貪婪
FB Page︰meatbonetea金融肉骨茶
本欄逢周一刊出
大師冇點你 - 李聲揚 舊文
本文作轉載及備份之用 來源 source: http://hk.finance.yahoo.com
