向左走向右走
2012/6/15 上午 09:14:55
網誌分類: 經濟
希臘大選就快揭盅，「牙」痛愈來愈嚴重，西班牙債息到達不可持續的7厘，搞到美股這隻「小狗」愈來愈癲，向左走向右走，一日升一日跌。投資者反應慢些，都會俾佢咬中。我就覺得美股在希臘大選前失去方向，無論係升係跌，都不能作準。
美國經濟數據唔多靚仔，通脹回落大過預期，首季度經常帳赤字高於市場預計，首次申領失業金人數又較預期高，但通脹比預期低，在經濟愈唔好愈有機會QE(量化寛鬆)的情況下，壞消息當好消息炒。市場普遍認為聯儲局推出QE3的機會唔高，但歐洲局勢不穩定，美國經濟表現唔理想，當局會延長「扭曲操作」(沽短債買長債推低長息)這個變相QE的時間，可以長期保持超低息狀態，對美股有支持。
評級機構Egan Jones唔知係唔係玩快速降級玩出癮，上日將西班牙主權評級降至垃圾級水平CCC+。昨日又出招，打擊對象轉到法國，將該國主權債務評級從「A-」下調至「BBB+」，原因是預計「法國信用狀況惡化以及法國銀行需要獲得支持的情況下，可能會令該國承壓。」報告指法國國內五大銀行的資產總規模，相當於國內生產總值(GDP)的282%。鑒於法國傾向於支持國內銀行業﹐法國政府可能很快面臨債務大幅上升問題。報告的推論，點解聽來好有「阿媽係女人」的味道！放諸各國皆準。法國10年期國債息率2.67厘，與西班牙接近7厘，仍有一大段距離，若然搞到法國債息大升，又係一場危機。
美股昨日一開市就升，但Egan Jones的評級報告在午後一度打窒美股的升勢，杜指升幅由115點回順至85點，不過，「過山車」在收市前一小時才進入驚嚇階段，市場傳出全球多家央行正籌劃方案，一旦反對緊縮政策的希臘極左翼聯盟Syriza在國會大選中勝出，將提供足夠的流動性穩住金融市場。受消息刺激，杜指在幾分鐘內急抽近120點至全日高位。但升得快，又跌得快，幾分鐘內又跌番大半，不過臨收市再上，杜指收市仍有156點進賬，收報12652點。
港股美國預托證券跟隨造好，ADR港比指數報18958點，較香港收市高150點。其中匯控收66元，比香港收市高1.2%。
希臘的情況無得估，但每一個可能都保留一種反面。若支持緊縮的新民主聯盟獲勝，唔爆鑊股市即時會升，但美國聯儲局隨後開會，推QE3的機會也相應下降。若反對緊縮政策的希臘左翼聯盟獲勝，當然股匯會大插，但有分析指左翼聯盟也不會即時宣布退出歐元區，而係會和歐元區講數要求大幅放寛緊縮限制，歐元區和國基會都有可能讓步，而且包括聯儲局在內的各國央行亦會大力放水，對應希臘的亂局，所以股市存在先急插後急彈的極端走勢，所以見到乜?炷灡均A都唔好過度興奮，或過度悲觀，或許這就是美股急上急落的原因，大家都?唔定主意。
陸羽仁
回應(7) 我想回應
陸羽仁 BLOG 舊文
