金融High Tea——等執死雞
2012年6月15日
歐洲成為全球金融市場最弱一環，希臘投票未有結果前，西班牙畀評級機構狂踩，「牙痛」拖累全球股市無啖好食，港股跟隨外圍急插。
「晒冷」就有平貨賣
借住內地減息的刺激，港股反覆彈上萬九點，在希臘投票有結果前，投資者避險係正常反應。中環茶友話，呢兩日「落疊」，如果希臘選舉無出事，只係買平幾百點，但萬一出事，隨時就輸過千點，大家梗係少做少錯。
牌面睇，而家希臘選舉又係勢均力敵，隨時要籌組聯合政府，但照睇就算激進派的「希臘長毛」上台，多數都係拋出強硬立場，以「脫歐」嚟同歐羅區各國政府講吓數，要求減低緊縮力度，而唔係真係脫離歐羅區。不過，若然出現「晒冷」，個市肯定會挫一挫，就算想買平貨，好多寧願等等有無執死雞的「餐屎」。
係買意失蹤下，恒指開市失守19000點，午後最多跌超過230點，收市勉強企於18800點樓上，收18808點，跌218點，完全抹去了上日升幅。大市成交只有382億元。市場觀望氣氛濃厚。
內地暫時無特別消息，國企指數表現更弱，跌1.5%至9519點。內地A股都係咁弱，上證綜指再度失守2300點，跌1%至2296點。上海深圳總成交約1350億元人仔。
港股尾市跌幅擴大，除咗期指愈跌愈多拖累外，亦受歐洲開市偏軟影響。港股昨日上升的股票只有260隻，下跌的超過700隻。最觸目驚心的是思捷環球(330)。公司行政總裁上日突然辭職，搞到股價大插逾兩成兼中途停牌。但股東未驚完，思捷主席都話唔撈。雖然思捷搵到財經界資深大老柯清輝出來掌舵壓場，但仍然留唔住投資者的信心，股票復牌後股價再勁插超過12%至9.23元半年低位。零售股無資產打底，有事就人人爭相跳車，兩日內股價唔見咗31.5%！
大市無神無氣，但有國策支持的相關股，仍然逆市大勇。一瓣電力股。發改委昨日表示，「階梯電價」具體方案將於月中陸續出台，7月1日起全國實施。階梯電價分為三檔，第一檔為基礎電量，要求覆蓋80%居民家庭用電，保障不加價；第二檔用電量要求覆蓋95%家庭，每度電價升5分人民幣；第三檔為剩下5%用電最高家庭，每度電價加0.3元。
阿爺怕推高通脹，所以唔批准電力公司加電費，煤價又長期高居不下，搞到電力公司長期虧損，電力股長期不振，最近終於「守到雲開見月明」，電力股昨日逆市大反彈。華電國際(1071)抽升7.3%至2.21元，中國電力(2380)亦漲近6%至2.03元。
靜市炒吓送禮股
另一瓣勁升的股票係券商股。內地傳媒報道，中證監擬允許證券公司向商業銀行借貸，以助其擴展業務。報道稱，這個方案是為打造中國的大摩或高盛舖路。另外，胡總「七一」訪港慶祝特區成立15周年，發改委預告阿爺會送大禮俾香港。市傳可能會搞富貴版港股直通車。證券商直接受益，相關股票昨日大炒特炒。申銀萬國(218)炒高7%，國泰君安國際(1788)、第一上海(227)及英皇證券(717)齊升逾3%。茶友笑言，阿爺送大禮送咗咁多年，好似靚女收花都收到慣，都好難有驚喜，大家炒送禮，最緊要係記得識落車，唔好炒炒吓自己都信咗就得嘞。
陸羽仁
上一頁 下一頁
金融High Tea 舊文
