魚樂無窮：細細粒H股醞釀喪炒
■國泰君安一送二紅股噚日除淨，單日炒高12%。圖為集團主席閻峰。 資料圖片
一間公司如何增添炒味？最簡單方法，莫過於拆細或送紅股，兩個方法一個目的，就係將股價推低︰一隻10蚊嘅股份，一拆五後變成2蚊，如果一送四紅股，效果亦會一樣。股價變平有乜好處？一、入
場費平咗（假設手數不變），參與炒賣嘅人自然多咗，吸引到強國人更加不得了；二、股價低啲，升跌一格幅度會加大，個場自然更旺。
國泰君安（1788）一送二紅股噚日除淨，單日炒高12%，林麥集團（915，臨時編號2907）仲誇張，一拆五除淨後連爆兩日，合共升咗五成，快過印銀紙。大價股變細已經咁癲，細價股仲得了？
機會就在你眼前︰上海棟華（1103）最新業績宣佈，建議10送5紅股，睇番棟華股價，嘩！一蚊雞咁大把，下周四除淨後，變番毫子股，炒味打孖上。上海棟華主要從事路橋建設及石化產品貿易，市值10億唔夠，H股之中可謂絕無僅有。曝光率雖低，但業績一啲都唔失禮，最新盈利增兩成，市盈率僅6.6倍，派息亦穩定，最新息率超過三厘，絕對係平靚正之選。講前景，路橋建設手頭定單達18.4億人仔，預計未來3至15個月完成，業績已有保證，管理層講明會拓展至新疆等地，心水清嘅戰友都知新疆乃一帶一路核心區，上海棟華大把世界。噚日一棍突破阻力，似係聰明錢率先入場，好戲在後頭也！
唐牛
https://www.facebook.com/tongcow88
唐牛
魚樂無窮 - 唐牛 舊文
