中環在線：
「乜股都飛升 利豐鬱都唔鬱」
股東責怪 馮國綸無癮
■馮國綸（左）被小股東窮追猛打後，見記者時依然扁曬嘴，在旁的馮裕鈞也很無奈。 朱家駿攝
經濟轉型，中間人角色逐步式微，搞到做傳統貿易生意嘅利豐（494），近幾年股價冇乜運行，由2010年高位時21元，跌到今時今日得番7
.5元左右，唔少長情股東都好肉痛。個別小股東趁住噚日股東會向大股東發洩一下，埋怨到主席馮國綸無曬癮。
利豐舊年盈利跌12%，股價表現又不濟，佢哋今年舉行股東會終於知慳識儉，由以往例牌喺中環文華東方酒店租場，改為喺利豐位於長沙灣嘅辦公室舉行，慳番筆。
投訴收購冇錢賺
唔知係咪因為地點改咗，令利豐小股東有所感觸，噚日明顯較以前踴躍發言，而且大部份都係投訴股價表現。
其中一名說話帶點鄉音嘅女士，自稱喺廿蚊買入利豐，指最近港股進入大時代，「乜股都升到雞飛狗走」，但利豐股價鬱都唔鬱，佢大呻「好失望呀！」
講到興起，佢仲勸利豐管理層「唔好成日收購，收購完又冇錢賺！」，激動到爆多句：「你睇人哋李嘉誠先生幾叻！」當堂令到馮國綸面有難色。
另一名女股東就建議利豐減董事袍金，「唔好淨係得我哋（小股東）付出。」佢咁講又啱喎，公司表現不濟，董事當然要有啲表示喇。
對於小股東的連串不滿，馮國綸承認，利豐嘅採購業務係屬於「舊啲嘅業務」，𠵱家出面好多人都關注利豐點樣轉型，又指公司已經落咗好多工夫，「我哋係行業一哥嘅位置從來冇變過。」佢希望股東有耐性。
至於董事袍金方面，馮國綸指出，以上市公司去講，利豐嘅董事袍金已經算係低水平，而且多年來都冇調整咁話喎。
散戶精明 識引用分析報告
小股東鬧上市公司大股東或管理層，其實都係愛之深、責之切箒，需知道做得實物股東都係長情股東，而且，𠵱家小股東嘅水平越來越高，留意公司業務之外，亦睇埋分析員報告，十分精明眼㗎。
噚日有名小股東直指，「（早年）有人唱衰公司，話股價會見7蚊，點知𠵱家真係得7蚊，近排仲唱到去5蚊，咁點呀？」
佢講緊嘅，咪係曾經跟利豐隔空駁火、多次睇中利豐業務轉差嘅投行瑞銀囉。瑞銀前年底有份報告將利豐目標價調低到7.5元，本月初瑞銀一份新報告，繼續建議沽利豐，目標價係5.2元。可惜，管理層都講唔到股價會點。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文