女神tea time：
買定券商股 迎接走資潮
■時富金融股價近日蠢蠢欲動，不失為個買定少少等深港通開波嘅選擇。 資料圖片
噚日放假，聽日又放假，今日要返工嘅你，無心戀戰係冇人會怪你嘅。不過正所謂快人一步，理想達到，人人發吽𨛦你做準備，贏家仲唔係你？
話說港股通總餘額
已降至902億元，相當於已使用額度的63.4%，證券業預計3個月後，港股通就爆額，到時或者「能沽不能買」。即係咁，好似內銀咁，近呢一個月以來扶搖直上，但明明A股平過H股，點解仲要咁蠢買港股，你估真係嫌錢腥咩？其實好大可能係因為想借道走資。
上個月中國外滙儲備，已跌到去4年半新低；與此同時，你見到香港上月進口激增243%，不過你睇埋去年12月至今年4月中國海關數據，香港的進口同比升幅，由64.5%不斷擴大至203.5%，而同期間香港官方數據顯示，對中國大陸的出口同比跌幅平均達5.8%。呢幾條數同時反映一件事，就係中國人𠵱家用盡方法走資！
𠵱家港股通就嚟爆額，當局好大可能會增加限額，與此同時，加埋深港通隨時開波，到時大閘一開，資金多條路走，仲唔衝曬落嚟。港股旺炒券商股就最好，所以是日推介時富金融（510）。
首先，華富（952）自從公佈賣盤衰咗後，股價跌無可跌就掉頭炒，同業率先炒作，時富金融都冇咩點鬱過，明顯落後。
大家都仲記得，市旺時證券殼炒到癲，時富金融都曾傾過賣盤，向泛海控股出售40.71%股權，代價6.13億元，相當於每股收購價0.37元，當然最後傾唔成。不過近日股價重上返0.37元呢個阻力位，隻股似乎蠢蠢欲動，不失為一個買定少少等深港通開波嘅選擇。
Fifi
http://fb.com/lovefrystock
本欄逢周五刊出
Fifi
女神tea time - Fifi 舊文
來源 source: http://hk.apple.nextmedia.com