智取大市：邊隻強勢又唔貴
■吉利汽車近期股價破曬頂，而估值又唔算十分貴。 資料圖片
雖然細價股斬倉、恒指亦跌，但周四港股充其量話係個別發展，手機股、地產股繼續升，明明港股連續幾日即市咁反覆，但大戶照樣掃高強勢股，原因係佢哋上車價實在太低，lead住太多，唔介意拎多少少注碼出嚟，將股價
mark得有咁高得咁高，索性炒到爆為止。即使掉頭掟落嚟，掟得有幾狠都好，都仲係贏成條街。𠵱家呢批股，估值高，潛在下跌空間可以好大，策略上，有貨逢高減，冇貨就唔好狗衝了。
不過有一個好現象，就係港股兩極化情況依然存在。即使嚟緊港股調整又好，進入跌浪又好，再次去番有如今個月嘅低風險日子，兩極化情況始終會再發生，即係話，跌完都會有股升，唔會靜到連搵食機會都冇。問題下一轉仲係咪炒手機、科網、地產、高息股。
唔理下一轉炒乜住，但亦有近期強股，股價破曬頂，而估值又唔算十分貴，可以備忘先。吉利汽車（175）預測2016年市盈率12.4倍，略高過汽車股約10倍嘅長期合理估值，但減咗淨現金每股0.8元，預測市盈率10.6倍。至於佢有乜條件可以獲得偏高估值，同時股價能夠破頂？下星期再研究。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com