【不問價追】澳門遊（小炒王梁心欣）（第104期）
2016-12-25 14:00:46
隔咗年幾兩年冇去過澳門，今次趁周末去澳門一趟，感覺係周圍都俾內地人包圍，連我都要講埋普通話一樣，唔講反而有少少似異類。我遊走了永利、金沙、澳門銀河等地方，甚至連最近澳門外港碼頭的「
海立方」我都見識埋，算係一次幾圓滿嘅澳門旅程。
首先，我即刻去睇下最低消費嗰張枱要玩幾多錢？原來200元都有，仲要位於金沙（01928.HK）威尼斯人，係一張玩大小的枱，睇到嗰下我都有啲嚇一嚇。埋枱玩大細我就冇，我走去特別鍾意玩嘅「加勒比海」，當時已身在永利，點知一埋枱，莊家就開咗「三條9」，唔知係咪我旺起個莊來，最終我敗走而回。呢張枱最低消費300元，成場都係得個兩張，坐滿曬人，全部係香港同內地人，外國遊客欠奉，特別再望一望VIP房，小貓三四隻，有好多荷官都係冇嘢做，反而中場呢邊旺好多，電子輪盤機、大小機、百家樂機全部full曬，證明VIP客冇得做，走中場路線先正路。
睇中場梗係去銀河（00027.HK・銀娛）望嚇啦。其實一入氹仔就畀澳門銀河嘅威勢吸引著，超巨型嘅建築，金碧輝煌。佢對面仲開咗澳門百老匯酒店。好記得呂志和一家講過著重發展度假式旅遊項目，我特登走去百老匯一趟，結果發現佢哋主要針對內地客，好多嘢都寫簡體字，但佢的百老匯商店街就真係說到做到，引入好多澳門嘅小商店，特別係飲食，牛雜、度小月、茶餐廳、義順等，價錢仲要同出面差唔多，咁你話在賭場酒店附近食到咁平，係咪有一定叫座力？百老匯主打平價路線，連自己嘅穿梭巴士都冇，要搭你就要步行到澳門銀河，但從營商嘅角度嚟睇又真係慳好多，不得不佩服呂氏一家嘅遠見。
要講最低端嘅，都係第一次去到「海立方」，呢邊比較近似舊葡京嘅玩法，相當之多內地人，兼且不斷叫囂，但你睇到生意在中細場來講算相當唔錯。可能係地點優越，一落碼頭行條天橋就會到海立方，我更加走去樓上餐廳視察下，價錢等同香港嘅茶餐廳，唔知係咪特別優惠客人。我去咗間類似酒吧嘅餐廳食下午茶，價錢只係30元鬆啲，話曬喺賭場入面，價錢真係好抵。
綜合多方面的目測，澳門嚟緊都係主力靠內地人生意，甚至你見到有酒店特別為內地人而起（以簡體字做標榜），可想而知佢哋嘅購買力有多大。遊走下賭場嘅商店，貴價、中價嘅全部佈滿內地人，甚至在路邊都聽到內地情侶話一定要去莎莎（00178.HK），咁就預測到內地人的購買能力仲係相當足夠，亦係澳門嘅單一支柱。但你話貴賓廳嘅客人同埋高消費嗰批真係買少見少。澳門股嚟緊都係走上落為主，增長動力會稍為放緩，但你話會唔會死，就一定唔會，有勢就應該買入。最後補充一下，今次小炒王係乘搭直升機前往澳門，經驗難得。下一篇文就會詳細講解下直升機飛航嘅生意。至於直升機嘅費用我已經向金沙同埋海立方拎咗啦，多謝大家關心。
不問價追 - 小炒王梁心欣 舊文
來源 source: http://www.winmoney.hk