不問價追 - 小炒王梁心欣 2016年12月4日
【不問價追】小炒王國復活（小炒王梁心欣）（第101期）
2016-12-4 15:00:22
我小炒王要借一借《港股策略王》呢個平台宣傳下自己。如果有睇開小炒王梁心欣Facebook 都知，「小炒王國」在12月正式復活，好好彩咁追上「深港通」尾班車，等我可以同大家一齊炒股，起碼有個伴麻。
好多人都問我喺邊度有得收睇？今次小炒王又做創辦人啦，仲要全港首創用Apps睇直播，隨之而來Facebook、YouTube、WeChat、甚至部份內地網站都可以收看。由於平台係自己嘅，絕對可以暢所欲言，繼續自有風格，一齊分析同研究股份。由於成個節目得我一個人，相信出力會加倍，所以先以一小時節目會一會大家，等平台有更多支持，先再出加長版吧！
節目名稱「tasty money」由我命名，意味著搵錢是何其滋味，何其有趣的，希望大家可以從數字上搵到趣味，唔好覺得做股份分析又悶又累！Tasty money 內包含了「小炒王國」以及寶盛證券特約的「小炒倉」，倉位由廿萬起家，適合一些初出茅廬的朋友仔參與，等大家唔好覺得買股是有錢人的遊戲，適當地投入市場。
咁當然唔少得我一眾的股友嘉賓，羅尚沛、盧志明、Sky sir 、孫柏文、火燎森、李兆富、歐陽一心、棋亮、魏力、唐牛、蔡進、陳鳳珠、諗sir、梁傑文等等等等，（其實我一頭煙，未約曬），佢哋基本上都冇問過我節目搞乜，就已經應承上來做嘉賓，所以絕對係畀面我，在此感謝一眾好朋友。
呢檔嘢搞起上嚟勞心勞力，由搵廠、搞節目內容、起埋個廠，仲有解決好多好多技術問題，都一手一腳搞掂，真係累到嘔。搵廠搵到我想喊，因為又要租得起、又要樓底高，我真係經歷史無前例的氣餒，所以最後都搵到適合的地方，我係非常開心。不過呢種辛苦，同空閒以及「口痕痕」冇嘢講嗰種辛苦，真係冇得比。因此特別感受到兩年前港股策略王埋班嗰種苦況，先多謝社長陳承龍兩年前對我的關顧，等我唔使搵office 搵得咁辛苦，好多事情都由佢一力承擔，唔使我兩頭走，我完全感受到佢當年的辛勞，在此謝過。
我無因為起新公司而離開策略王，大家唔好誤會，我會繼續同策略王與時並進，走向高峰。新公司係走live show 路線，待東風一到，節目會更加豐富豐盛。我堆朋友點都走唔甩，會繼續仗義相助。新節目會遊走埋內地，所以有機會以普通話示人，希望大家頂得住。
特別多謝幕後功臣，我的拍擋，前期工作靠曬佢，希望我的表現唔會令佢失望。由於1/12開波了，我反而沒有緊張，竟然有無比興奮，我只係希望一齊順利，始終我都在電視大，做節目應該駕輕就熟，希望大家鍾意全新的視頻體驗，由梁心欣帶畀你全新的觀看習慣！網上見！
不問價追 - 小炒王梁心欣 舊文
來源 source: http://www.winmoney.hk