【不問價追】雞年，衝呀（小炒王梁心欣）（第109期）
2017-1-29 13:00:14
猴年埋尾雞年將到，先在此祝大家雞年「行運一條龍」。
農曆年假前，港股再度衝上23,000點嘅水平，加上在成交上有所突破，特別係18號（星期三）當日1:00左右已經見到400億成交，
好明顯係大戶嘅手影，基金儲貨格局（事關1月份大部份全日成交得500幾億，一個上晝已經有400億實屬異常）。小炒王原本以為要在1月下旬先開始蠢蠢欲動，但大價股、中價股已經有錢到，所以恆指可以再望得遠啲。
咁望遠啊？如果企到23,076點呢個近期高位，我哋就應該逐步走上500至1000點。如果要搵同大市敏感度高嘅股份，首選本地嘅證券股。大家應該開返股價圖一齊睇：國泰君安（01788.HK）、海通國際（00665.HK）、申銀萬國（00218.HK）、第一上海（00227.HK），全部都在一年低位冇鬱過，如果大市見返23,000點，呢堆股份值博率其實非常之高。因為深港通已經開通，只係錢未到，萬一流少少落來，呢堆股份就會最受惠，現時仲要畀個低位你買，相信持有返一、兩隻，幫個倉進補一下，絕對有機會賺返兩成或以上。自己心水就以頭兩隻為核心，熟我的朋友都知665係我長期心水，1788就夠力夠快，所以以呢兩隻為先。
另一心水要睇嚇大新系。大新金融（00440.HK）已經率先爆上，顯示聰明錢有所部署。我反而鍾意大新銀行（02356.HK），眼見中銀香港（02388.HK）、恒生（00011.HK）、東亞銀行（00023.HK），全部升上一年嘅高位，如果要追落後兼且有收購概念，大新銀行係一個唔錯嘅選擇。呢隻自己炒過相對熟悉，加上本地銀行買少見少，一旦內地資金湧港，最鍾意吼實我哋銀行嘅分行網絡及香港客源。大新銀行具備以上嘅特質，現時喺$15樓下嘅水平，依然吸引。食息一族就唔使諗，大新銀行派得唔多，鍾意有息嘅都會揀返中銀香港同埋恒生，所以買得大新嘅話就唔好貪息。
大市生猛返，好多以前嘅愛股即時浮現，大家應該趁農曆年假好好部署，搵返一堆自己嘅心水股放在口袋，等有勢嘅時候就衝、衝、衝。踏入雞年，千祈唔好忘記要食大浪，祝大家撈到「風山水起」。
不問價追 - 小炒王梁心欣 舊文
來源 source: http://www.winmoney.hk