摸魚手劄：一個關於打劫的故事
■金融市場或會出現老千合法地打劫股民。資料圖片
賊人瑟縮一角，正等著獵物走入後巷。
「舉高雙手，咪鬱。」賊人架刀項頸，獵物是一個帶黑粗框眼鏡、孭住背囊的毒男。
「冷靜少少，我舉高著雙手，好難咪鬱㗎喎，邏輯都講唔通啦。你劫財好了，不必劫色。」
「細路你咪
咁寸喎，新聞話你呢個唔起眼嘅毒男，手持一間估值四十幾億嘅科網公司。我查過你唔請保鑣，自然搵你落手。總之，你有四十幾億，我唔要多，只要你手上嘅現金，攞出嚟。」獵物不慌不忙，把手上所有的錢，也是那兩千多元的現金拿了出來。
「嚇，又話四十幾億，你帶得幾千銀出嚟，你係咪玩嘢啊？」項頸的刀劃出淺淺的血痕，但不傷性命。
「你要睇多一啲新聞，現在支付寶已經可以用嚟叫雞，遲點用途更廣，手機又可以畀錢，我唔帶錢都好合理。最多我畀埋張八達通你，今朝增咗值，都有五十蚊㗎。」
「咁你有四十億嘛，總唔會那麼寒酸吧？」
「四十億只係我公司嘅估值，我身家冇四十億，連一億都無。公司唔係只有我一個股東，我雖然係創辦人，但我只有20%股份。只有我公司上市之後，股民埋單，我先會分到億億計嘅錢。換言之，四十億係水份，我現在真係身無分文。賊人大哥，你睇新聞，都要睇得仔細少少。」這句話聽到賊人懵懵懂懂，他不明白，但聽起上來很有意思。他隱隱覺得，獵物做的勾當，本質上跟自己竟有點相似，但好像更高級一點。
差人來至，講了一句五分鐘似曾相識的話：「放低武器，舉高雙手，咪鬱，你已經被包圍啦。」
若幹年後，毒男的科網公司上市前做了幾輪的風險融資，雖然持股大減，但總算成功上市，估值過百億，上市第一日就炒到飛天，但第二日已在高位掉頭殺下來，成就不知多少金融佬、基金佬賺來大錢。毒男在兩年後減持，也套現三、四億，然後正式退休。毒男雖然都有賺錢，但相對百多億市值，沒有想像中多，反而佔大份的風險投資人，賺得更多。
另一方面，賊人亦洗心革面、洗盡鉛華，正式在監獄內讀書進修自己，參透了毒男獵物跟他提過的每一句說話。他已經為自己的錯誤付上罪責，現在遊走中、上環之間，眼戴Armxni眼鏡，穿上Paul Sxxth西裝，成身名牌子，活出自己人生新一頁……成為了一名老千，合法地在金融市場打劫股民。
祝所有在科網新股浪潮玩得高興、炒得開心的那麼多位，有一個愉快的週末。
渾水
專業投資者、上市公司執行董事、90後
http://fb.com/muddydirtywater
摸魚手劄,_mt_投資
渾水
摸魚手札 - 渾水 舊文
來源 source: http://hk.finance.appledaily.com