大棋局：貿易戰打開中國缺口
近日有消息傳中美貿易戰嘅講數條件，係中國對美國減少2,000億（美元．下同）貿易順差。中美貿易戰，我哋睇一條簡單數便能掌握其本
質。首先，現時中國每月貿易順差（綜合對全球貿易，非獨指美國），約370億，所以一年貿易順差約4,400億。呢啲係死數，個個月唔同，所以取其概念就可以。
中國對美國的貿易順差，中美計法唔同，各執一詞。中國話每年3,000億左右，美國話每年4,000億。上述流傳中國對美國減2,000億貿易順差，係指一年，攤開即平均每個月167億。若傳聞係真，可理解為中國對全球貿易順差會唔見一半。
問題就嚟。自2015年人民幣匯改後，中國外匯儲備急跌，由2014年近4萬億頂峯，跌至現時3萬億。中國外匯儲備止跌，一大支撐力就係來自貿易順差，等於每年多4,400億頂住。若中國貿易順差減一半，雖然仍有盈餘，但人民幣貶值壓力便大增。美國又唔畀你人民幣大跌，否則將中國定為匯率操控國，呢頭貿易戰講和，嗰頭貨幣戰嚟料。人民幣匯價要硬淨，央行要沽外匯托人民幣，結果外匯儲備進一步收縮，人民幣貶值壓力越來越大。估計中國會搬入口他國條數應付美國，用乾坤大挪移壓低順差減少的壓力。
上述情況係咪似曾相識？無論係1965年戴高樂沽美元揸黃金，要美元同黃金脫鈎；1985年美國聯合沙地以石油夾爆蘇聯，燒乾蘇聯外匯儲備；1989年美國逼日圓升值刮空日本；1992年索羅斯狙擊英鎊；1997年亞洲金融風暴，關鍵都只有一個：匯率。70年代之前，黃金係世界硬通貨，所以法國可以拎黃金嚟玩美國；70年代後，美元係世界硬通貨，所以美國可以拎美元去玩任何一國。
貿易戰無論最後是否講掂數，佢嘅作用都只係打開缺口，等同放血。中國人天生比較蠱惑，管仲2000年前已經識打貨幣戰，所以美國唔可以好似對蘇聯或日本一招了結中國。直到今時今日，仍然有人相信中美經貿合作關係緊密，美國唔可能像昔日對付蘇聯咁對中國。經濟戰、貨幣戰，唔係要打到一個國家滅國，而係打到你心甘情願做第二聽佢支笛。
歷史之演變，令美元成為全球貨幣體系的定海神針，美國必然會想方設法去維持其規則制定者的地位，就如同共產黨會用盡方法維持其在中國專政之地位。喺呢啲情況下講對錯，嘥氣，只有講勝負。
Mr. Tregunter
Mr. Tregunter
大棋局 - Mr. Tregunter 舊文
來源 source: http://hk.finance.appledaily.com