摸魚手劄：我與經紀決戰樓盤之巔 - 渾水
每次有新盤銷售，地產經紀的熱情招待往往令人難以招架。資料圖片
農曆七月十四，除了係前梁特的生日之外，也是鬼門關大開之日。沒想到今次的鬼門關今次開正觀塘，那夜黃昏，我搭上開往樓盤示範單位嘅的士。果然一班名為「地產經紀」的生物，如同餓鬼一樣，向我這
待宰的羔羊虎視眈眈。
地產經紀有兩大泰山北鬥，分別係黃色的少林，以及紅色的武當。至於點解武當係紅色，是但啦，你知我講邊個字頭咪得囉，唔好深究。我架的士路過觀塘示範單位，一班少林的俗家弟子不停拍打的士車身，車身微震發出巨響，掌法剛勁淩厲，耳力很好的我聽得出這是七十二項絕技的「般若掌」；另一位用手指敲打的士玻璃，鏗鏘有聲，沒想到我有幸見到另一絕技「摩訶指」。
我知道一打開車門落車，必有一場腥風血雨，只好凝神待息。果然，車門一開，一位弟子以極快擒拿手法扣住我左手手腕脈門，這可是達摩祖師和空性神憎的少林絕技「龍爪手」，順勢把宣傳單張硬塞到我手，說：「呢個盤好抵啊，唔買都睇嚇啦！」我脈門被扣，內勁使不出來，只好回道：「老友，你好放手喎，大家道上朋友，別逼我去衙門報官府。」經紀不理，我只好使出「蘭花拂穴手」化解，順便使出姑蘇慕容的「以彼之道，還施彼身」把單張塞回去他手。
經紀擠於車門，我出不來，無奈之下只好提氣，使出「天山六陽掌」把這班經紀推開。我離開車門後，眼前七個經紀居然一擁而上，擺出「天罡北鬥陣」把我圍倒。我使勁腳踏八卦易位，走出一套「淩波微步」，沒想到這班少林友連全真武功都掌握到，任我遊魚之滑、飛鳥之捷也走不出這個迷陣，我只好雙掌渾圓於胸，連續打出「降龍十八掌」、「黯然銷魂掌」、「仙人掌」和「諾貝爾經濟學掌」把他們的傳單攻勢格開。
由於先後打出幾路上乘掌法，我內力不繼，眼見仲有五、六條友想幫拖圍埋一份，我只好使出最後的「獅吼功」：「X！我個樣咁頹似唔似有錢買到樓啊？哪有錢，你老母！」語音甫落，整班經紀一哄而散，當然順勢問候我老母。
講番個樓盤，垃圾區賣萬幾蚊呎，仲要無二按。如果我有錢，我睇心理醫生醫我病入膏肓的中二病唔好？我使鬼買你咩。
渾水
專業投資者、上市公司執行董事、90後
http://fb.com/muddydirtywater
摸魚手札 - 渾水 舊文
來源 source: http://hk.finance.appledaily.com