摸魚手劄：填東大嶼無志氣，要填平維港 - 渾水
林鄭月娥提出要在東大嶼大規模填海，引起社會廣泛爭議。資料圖片
決而不議成為了林鄭的新管治方針，好像東大嶼這個媲美玫瑰園的計劃，居然費盡九牛二虎之力。特首和民間特首劉華互相補位都咁大民怨，實在Benz Brake——辦事不力。
東大嶼是
為新香港人而設的計劃，新香港人一直是幫香港人炒高樓價的財神，要把財神們安置在邊緣的新填海地區做開荒牛，又唔知擋風擋潮能力如何，我實在睇唔過眼，冷待財神，於心何忍，既然都搞寸咗個party，不如寸到尾，直接填平維港。
我已經有全盤計劃去填平維港。維港連繫住尖沙嘴財神旅客最愛的消費地帶，而且金融財神都已經落戶中環十幾年，將整個海填平，可以方便財神來往兩個香港核心地帶，尤其是林鄭有意在東大嶼發展商業帶，去東大嶼搞商業，點會方便過維港搞？中環延至金鐘灣仔銅鑼灣，直到對面海的尖沙嘴，本身就係成熟的商業帶，在維港發展商業只是成熟商業帶的橫向延伸，易搞好過啦，抄抄北京的「環狀」城市發展概念，幾好幾愛國啊。
政府老早之前已經委託顧問做了六隧分流的研究，明明無事㗎喎，係得幾個傻仔泛民話要回購西隧之嘛，西隧專營權過多幾年都退返比政府啦，你提倡呢味嘢又會被人話官商勾結㗎啦。今次隧道收費的改革又引起爭議，明明無乜問題又有研究結果支持，陳帆都搞到一鑊泡，無鬼用。不過唔使怕，只要填平維港，我哋就沒有隧道分流問題，因為隧道問題馬上downgrade做道路問題，傳統隧道繼續用，起多幾條路，交通都解決埋。
最近愛國的高鐵通埋車，成功通過一地兩檢。一地兩檢無志氣，當維港填平後，橫向發展一地要起多幾個高鐵站，索性一地多檢，方便把內地財神送來香港，又可以炒高樓價，做慣經濟動物的香港人，想起都開心。香港人常嫌隔離飯香，乜都搬新加坡出來，起屋又話新加坡好，填海又話新加坡有效率。現在新加坡做加密貨幣是地上最強，我們乾脆抄過來，在維港中央成立國際加密貨幣中心，緊接中環金融帶，好多硬件、軟件都唔難處理。最重要係方便內地班財神走資，然後我哋香港人中間又食一筆，咁先係大茶飯嘛。要搞加密貨幣有概念，維港搞又近中環，正啊。
最麻煩一定是環保友和政策推銷，首先我哋𠵱家玩緊決而不議，所以基本上唔使理班友，而且維港無白海豚，唔好難為李樂詩。今次推銷東大嶼用了劉德華，別忘記！我哋還有更親民更高人氣的周潤發，係時候要消費一下了，再加埋本身已經係愛國政協的周星馳。90年代最光輝的賭神、賭俠和賭聖三傑同台，仲有乜嘢sell唔到？90後出身的廢青，淨係識反對，識條鐵咩，收皮啦。唔夠的話，我哋可以搵埋在演藝界德高望重的王晶導演出來。嘩！上中下路的夾擊可以話係毫無破綻。
林鄭，你記住一定要聽我意見，到時你落實方案話我知，我會支持你，然後我就準備移民㗎啦。
渾水
專業投資者、上市公司執行董事、90後
http://fb.com/muddydirtywater
摸魚手札 - 渾水 舊文
來源 source: http://hk.finance.appledaily.com