【智取大市】重啟貿易戰跌市模式（晉佳）
自前年中美貿易戰開打以來，習近平與特朗普角力不斷升級。 設計圖片
上一期提到股市可能即將進入輪動跌市模式，但美國狂印銀紙確保冇系統性風險，難以令美股形成類似3月嗰種整個月單邊大跌市走勢，估計任何單邊跌市都會較短暫，可能幾日完成。
外媒話嚟緊星期六，
美國貿易代表萊特希澤同中國國務院副總理劉鶴將會進行視像會議，喺美股位處高位嘅情況下，大有條件發難，特朗普喺大選前，亦估計會放手一搏。
恒指方面，嚟緊有可能重返中美貿易戰時期走勢。回顧返2018年3月至12月同2019年4月至8月兩個階段嘅中美角力時期，恒指一有壞消息，指數就會出現數日急跌，然後呈上落市，再有下一轉壞消息又會再跌過，途中欠缺具意義嘅大市反彈。未知星期六會唔會成為中美新一輪爆發點，相信指數稍後走勢都會相若，至少去到特朗普同拜登之戰嘅勝負揭曉，到時再review。
配合之前所講，武肺疫苗嘅出現，會提早令股市資金流向樓市同實體經濟，美國亦會限制M2升幅，而最近連續兩個星期美國M2數字，出現3月中以嚟首次按周連跌，有啟示作用。即使疫苗嘅出現未必即時帶嚟極大幫助，但各國領導人肯定會借機進一步重啟經濟，於是無論如何都會對股市資金流構成衝擊，至於中美負面消息就更加係向股市「加辣」。休股期即將來臨，與此同時繼續物色真正長線復蘇概念股，等待下一次機會。
-----------------------------
【全球樓行】 Dream House零距離
屬於香港人的移民攻略
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：
iOS / Android
智取大市 - 晉佳 舊文
來源 source: http://hk.news.appledaily.com