【收市閒情】一次肺炎，勢加劇港移民潮（千頌C）
瘟疫出現，永遠係三分天災，七分人禍，今次疫情之所以失控，再一次又係中國衰隱瞞疫情，武漢市場周先旺接受訪問時講到，「作為地方政府，我獲得信息、授權之後才能披露，這一點在當時很多不理解」證明喺中國，政治永遠淩駕公共衛生。
「經過呢單嘢，我真
心諗住搞移民。」過去半年，香港暴政都趕唔走朋友K，但原來香港都係政治行先！天災殺港，正常人代入林鄭去諗，「今次仲唔係個天畀機會我翻盤？」又真係估你唔到，林鄭原來可以唔正常到呢個程度，由是否呼籲戴唔戴口罩、是否封關、粉嶺暉明邨是否用作隔離營，每一次都係有新問題先解決上一個問題，時機perfectly missed。
係，我哋呢啲蟻民，邊識嘢！
全民口罩，梗係唔得，我推緊反蒙面法！
封關？傻的嗎？咁咪畀暴徒屈我搞港獨？再者，我仲要顧及大陸領導心情！
香港都封，領導如何先走？
同2003年沙士相比，老實講，情況更令人擔心。點解？因為中國人有錢咗！正如友欄欄主程凱所講，中國人均GDP由2003年的1,000美元，大增至2020年的10,000美元。即係咩？財大，但仍然氣粗。
2003年沙士前，香港冇自由行簽證，以2002年全年計，內地旅客只係638萬；到2019年，就算有半年抗爭，全年都有4377萬人次，唔少人已當香港係大型超市，香港買曬日用品。如果香港唔封關，好自然更加要落嚟買口罩、消毒物資返大陸上倉啦。
再者，中國人公民意識薄弱，國難當前，緊係保命為上！
「我有錢，過咗海就神仙，飛去法國、衝去香港先啦。」
「冇事嘅，有病先去醫，冇事就去食海鮮。」
「入到醫院緊係唔同班人講我去過大陸啦，唔驚你唔醫我咩？」
結果大量人睇醫生時瞞報虛報，加重香港醫護負擔。喂，唔係呀，醫生要有醫德，係人都要醫，鬱啲就罷工？你林鄭因為政治問題唔封關，加大香港成為疫區風險，然後怪人罷工？係咩道理。即係你屋企爆水渠，然後你繼續開水喉，你工人話你先閂水制先開工，然後你怪工人唔拖地？要先自救，才能救人，這種常識都仲要爭論？
台灣已故著名作家柏楊本經典著作《醜陋的中國人》就有一句，「我們的醜陋，來自於我們不知道我們自己的醜陋。」由隱瞞疫情，到政治行頭，生命行後，中國係咁，香港亦然：政權諗政權利益；廢官諗自保烏紗；百姓只顧自己保命，今次瘟疫徹底由「自私」、「低智」釀成。信我，香港移民潮會再升溫，而林鄭今日應該閉門思過中，「思誰的過？思對方的過！」
諷刺嘅係，中共隱瞞疫情，本來係想維穩，維護「一個中國」；結果聰明反被聰明誤，中國而家分裂開幾多份？
by千頌C
http://fb.com/winbigwok
收市閒情 - 千頌C 舊文
來源 source: http://hk.news.appledaily.com