【平民投資教室】錢俊：港股真反彈睇兩個因素
平民投資教室
日期：2023-11-10
更新時間：16:27:57
過咗10月傳統股災月，11月港股突然發威，恆指由10月尾觸及萬六點到琴日曾升穿萬八點。到底港股係咪終於一吐汙氣，還是繼續又係死貓彈逃生門？
升市當然要拆解升市原因。升幅
主要係過去一個星期。美國聯儲局上周暫停加息嘅同時，亦有暗示本年餘下時間有機會唔再加。鴿姿出現，市場自然就振奮。恆指一周升3%，但另一邊箱美股其實升得更加利害，標指同期升5.3%跑嬴恆指，入面500隻股票入面有479隻升。因此今輪升市大機會由外圍帶動，而且美股受惠更多。唔敢講港股已經見底。
之後會否見底，要睇兩個因素。長遠嚟睇，都係睇中國經濟。中國央行會否有更多放寬措施，例如減息減存款準備金率，當局有無支持經濟政策，有無支持樓市方案等等，當企業同富豪有返錢，先可以講之後投資乜同發展乜。
近一啲就係今個月喺美國舉行嘅APEC峰會，到底習近平同拜登有無機會會面，之後又會宣佈啲乜，中美緊張關係能否舒緩，呢個都係影響中短期港股走勢同外國投資者嘅心理因素。
3405：亞洲電池及儲能技術
上周反彈升啲乜？科技股首當其衝，同時一啲硬件股表現都唔錯。比如富邦ICE FactSet亞洲電池及儲能技術指數ETF（HKG:3405），一周升8%，跑嬴港美股票市場。
基金顧名思義，主要投資喺亞洲多個市場上市嘅電池及儲能科技行業公司。唔好以為係整電芯咁簡單。因為電動車、智能手機、同再生能源等熱潮，全球對電池儲能需求極大。同時唔好以為呢個行業係歐美市場主導。電池業市場亞太區公司市佔率近68%，當中，中日韓三國更加囊括前十大供應商席位。因此除咗短炒，長線都有佢嘅潛力。
成份股方面，基金可以投資喺中國A股、港股、日韓、新加坡、台灣掛牌嘅公司，十大股份包括日本嘅全球最大智能手機電池供應商TDK、深圳股王及全球最大動力電池生產商寧德時代、韓國三星SDI及LG新能源等。
基金今年4月先上市，一手200股起跳，入場1,200蚊港紙就夠，容易加減倉。不過管理費要成0.8%，有啲偏貴，不過勝在可以涉足到多啲投資市場。雖然上周表現唔錯，但過去六個月仍然跌咗25%，距離家鄉仍遠，唯反彈時都可以好快，有一定值搏率。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com