笑到最後 - 高明 2023年11月18日
外人睇落會所好似係好神秘，圍內人嘅玩意，但到你參與其中，其實係家家有求。 (baloon111 via Getty Images)
鄰欄寫會所，勾起高明一啲回憶。現時施政強調夜繽紛，會所文化係當時自發嘅夜繽紛活動，好多高官本身都係會所會員，資料顯示亦有參與其中。
美股外幣即時報價 多國新聞任睇
FCC平過中環翠華
外人睇落會所好似係好神秘，圍內人嘅玩意，但到你參與其中，其實係家家有求。以高明其中一個會籍外國記者會FCC為例，當時入會要有兩個外國記者會籍嘅會員推薦。其中一個幫高明簽名嘅係Eric Wishart，AFP前總編輯，係當時嘅外國記者會主席，「你就係我哋想要嘅Member」，簽名嗰陣佢咁講。
外國記者會租雪廠街舊牛奶做會址，係港英年代留低，成個會如果只係外國記者私人派對，對會所對官方大家都有壓力，要維持租約，要侵多啲本地人玩，變相係跑數嘅一種，亦係頭先講嘅家家有求。當然，後尾FCC一樣面對續約風波，相信仲未完結，此乃後話。
外國記者會租雪廠街舊牛奶做會址，係港英年代留低。 (SOPA Images via Getty Images)
會所入面口腔期嘅嘢，唔使問，一定係FCC平過曬出面中環翠華（1314.HK）之類。FCC曾經出過下午茶，焗豬扒飯嗰啲大約42港元，連飲品，仲要凍飲係唔使加兩蚊，按揭利率加P都唔會影響飲食，而嗰期亦冇加息。
睇得本欄當然唔係淨係口腔期，事實上，外國記者會會所格局，源自英式文化，雖然將上層嘅英式會所制度帶嚟，但裝修、飲食，大致上同一般英式平民酒吧分別唔算大，本地化後當然招呼好啲、飲食好啲，如果純粹為飲食，十零鎊喺英國已可有同等飲食，並且唔使入會。
四大元素維持制度
維持一個會員制度，其實有四大元素：1.有著數、2.有面子、3.學到嘢、4.識到人。一個最完整嘅會員制度，就係大學學籍，特別以MBA尤甚。試諗嚇，其實大學都係一種會費制度，只係年期同交費方法有唔同，本質都係透過交會費進行會員活動，而大學嘅活動就係上堂。點解咁多人讀MBA？因為搵工易啲（有著數）、有Cert（有面子）、上堂（學到嘢）、有行政級同學（識到人），完美咁滿足維持會員制度嘅條件。
當然唔一定要有齊四大元素先可以維持一個會籍，例如Costco（COST），有著數淩駕曬其他一切元素；又例如運通（AXP），有飛行哩數同現金券等著數，如果有黑卡亦有面。
運通（AXP），有飛行哩數同現金券等著數，如果有黑卡亦有面。 (Dado Ruvic / reuters)
香港嘅會所，口腔期就係著數，入會門檻就係面子，例如外國記者會雖然只係飲飲食食，但有時見新識朋友，唔想大家樂（0341.HK）都會叫佢行上少少去FCC等，叫做互相畀面；識人就當然係會所嘅定位，引到咩人嚟，FCC嘅會員，其實相對其他會所斯文；學嘢就係間唔中嘅Luncheon等等。其他會所大同小異都會有類似嘅活動，例如跑馬坐樓上同坐公眾席，體驗都會有唔同。
再推而廣之，香港本身冇天然資源、冇工業，連同旅遊業，大部份實業對香港經濟影響唔大，主要動力都係金融同地產。成個經濟體系本質就係一個會所制度，地產就係會址，金融就係會員活動，四大元素本來都齊全，本地居民喺呢個制度上只算係會所員工，真正會員係外資同中資。點解近年咁多外資退會、中資就轉會去新加坡？例如有份參加金融高峰會嘅高盛（GS），彭博引述消息人士報道，高盛有份持有嘅上環永樂街物業減價出售。
發生呢啲事，真係值得深究。
高明
IG
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com