債券投資者收斂對減息預期嘅押注，刺激美債孳息回升。 (Matthias Kulka via Getty Images)
跌夠未？過去兩周，港股喺四連跌兼四連陰後回升一日，再喺三連跌兼三連陰後回升一日，又再兩連跌兼兩連陰，並且五度下試年內低位；上周恒指主要喺16300水平爭持，收16334
，似在築底。睇9天RSI跌至27，呈短線超賣，本周初或有反彈。如果成功築底，反彈先上望10天線16800水平；如果繼續尋底，個底會喺邊？①以雙頂量度幅度計，會跌至16000水平；②以下降通道計，會跌至底部15800水平。
美股外幣即時報價 多國新聞任睇
外圍方面，上周五，美股開市前出爐嘅11月非農新增職位高過預期、失業率低過預期，就業數據回勇，市場估計會拖慢聯儲局減息步伐，美股開市偏軟，但其後出爐嘅12月密歇根大學消費者信心指數初值高過預期，帶動美股倒升，三大指數都收升約0.4%。市場憧憬美國可擺脫衰退軟著陸，但債券投資者收斂對減息預期嘅押注，刺激美債孳息回升，10年期債息升至4.23厘；美滙指數升至103.98。
市場憧憬明年5月減息
Anyway，市場普遍嘅共識係聯邦基金利率已見頂，利率期貨顯示，本周聯儲局議息，繼續凍息機會達97.1%，結果將於本港時間周四淩晨3時揭盅；市場更普遍憧憬明年5月開始減息。至於美債孳息，美銀認為，美債喺首次減息前嘅升勢可能才剛啟動，過去5個加息周期，每次最後加息後，美債都大升，價升息跌，債息最多跌1.63厘，平均跌1.07厘。雖然10年期債息已由10月高位5.02厘跌至上周低位4.1厘，但仍高過7月上次加息時嘅3.87厘，估計明年5月或低見2.25厘。
港股向來受中美市場影響，美股受美國經濟帶動上升，中國經濟亦隱現好轉跡象，如上周四公布嘅11月以美元計嘅出口按年增0.5%，好過預期，事隔半年再錄增長，翌日滬股喺連跌四日後止跌微升。不過，點解中港股市喺美國加息見頂、債息美元回順、人民幣回升下，仍未顯著反彈？市傳同基金贖回有關，就算國家隊表態繼續買指數ETF，但ETF有贖回壓力，國家隊入市只係抵銷贖回壓力。
領展與美債息關聯度高
中港股市要顯著反彈，要等利好消息。上周五，中央政治局召開會議，提到明年要擴內需、穩外資、防風險；按照慣例，快將召開中央經濟工作會議，部署明年經濟工作。現時股市反彈乏力，原因之一係市場對經濟增長，尤其政策推進方面，受到憂慮預算赤字嘅影響，若GDP增長目標利好，A股以至港股先有望年尾標尾會。睇上周五北水18億元淨流入翻兜盈富基金（2800），似在等消息博轉勢。
姑勿論港股能否成功築底，纏繞港股嘅美息陰霾漸散，息口敏感嘅收息股吸引力回升，例如房產信託（REITs）、公用股等。當中，被市場視為利率替代品（proxy）嘅領展（823）更先於大市見底。美國10年期債息喺10月23日見頂，高見5.02厘；領展則喺10月24日見底，低見33.6元（經調整股價），上周五收37.9元，谷底反彈12.8%。據彭博綜合券商預測，領展市帳率0.53倍，股息率6.6厘，估值吸引。睇圖領展升破中期降軌，料展反彈浪，近日回補上升裂口，可分注吸納。
割柑人
www.fb.com/hkstockpicker
本欄隔周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com