港股持續下跌，對唔炒股嘅香港人嚟講其實只有好處、沒有壞處。 (Christoph Burgstedt via Getty Images)
望穿抽水，終於等到美帝勢力代表鮑威爾講出年減息，聯儲局官員預期2024年減息三次，其他對方冇咁盼，例如美股本身，差極都有大型科技股升緊，最盼減息嘅
地方係：1. 港樓；2. 港股。
美股外幣即時報價 多國新聞任睇
港樓暫且唔提，高明今日集中講港股，尤其係恒指，由年頭跌到落年尾，一度跌穿萬六點，指數回歸到主權移交時代，任何一個人，只要年頭將錢放入定存，依家極大機會回報跑贏港股專家。
股市持續下跌正常實體經濟都會有反應，香港人仲有錢一放假就去日本同中國深圳玩，因為存款利率跟美帝息口向上，窮極都有5厘過日晨，香港係一塊福地又一例證。
至於港股持續下跌，對唔炒股嘅香港人嚟講其實只有好處、沒有壞處。
1. 匠人精神崛起
投資市場，無論用幾複雜嘅專業術語包裝，最終只有兩個動作：買入同賣出。賺取嘅錢冇咁辛苦同複雜，任何有股票戶口嘅人都有機會賺到錢，相對其他大部份行業，例如紥鐵，就唔係人人可以做到。
港股過去嘅唔上唔落，導致所有有股票戶口嘅人都以為自己係畢菲特，花大量心血去鑽研，幾十年過去，畢菲特仍然只得一個，其他人嘅心血就浪費曬，亦係香港除金融外其他行業冇發展嘅主因。只要香港股市再跌兩年，全民心死，其他行業先有生機。
2. 企業投資取向
港股作為外資提款機，其實同樣係上市公司話事人提款。過去外資同上市公司宿主鬥快提款，提完外資就出花紅，上市公司就第二度再投資，不外乎買磗頭或買郵艇等玩具。股價低成交弱，集資難咗，香港磗頭亦冇咁易賺錢，企業搵錢要向實體經濟打主意，一隻手掌拍唔響，上述1嘅匠人都要有投資者，股市仆直、經濟旺盛，就係咁解。
3. 身心更健康
港股曾有財技股一說，即係喺上市公司公告入面搵微言大義，博公司賣殼。本來係內幕消息，包裝到刨公告可以知答案，大量人為炒殼股捱夜。依家恒指都收皮，其他股份直接收工，唔使捱夜刨公告。健康先係任何活動嘅基礎，恒指如果跌穿一萬點，香港有望成國際健康中心、國際長壽中心。
只要唔悲觀，我睇到恒指由萬入千嘅好處。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com