如果AI取代人類，最合理就係取代最貴而又重覆嘅經濟活動。 (Andriy Onufriyenko via Getty Images)
2023年全年加息，美股仍然強勁，救市措施就叫AI，一間連上市公司都未係嘅公司OpenAI救咗成個股市。所以做人思維要闊啲，唔好淨係諗「X指唔升係因為未有
政策」，有能力嘅人散佈喺唔同地方，此乃後話。
美股外幣即時報價 多國新聞任睇
雖然非正式統計，10間上市公司，連埋子公司11間都聲稱有AI概念。而顧問機構McKinsey報等指，公司使用AI由2017年嘅20%，升至2022年50%。不過都只係受訪者回應話有用，即係開個account都算有用到，依家用ChatGPT4同Bing事實上又唔難，所以講唔上取代人類。
現實上應用AI，其實應用率仍然低，ChatGPT大概可以幫你寫法律文件，但唔可以代表你打官司；你輸入病徵大概可以搵到咩病同食咩藥，但嗰個結果唔能夠應用喺拎處方藥上。另外亦有不足之處例如出圖一致性唔夠，要畫連載漫畫維持主角個樣嘅穩定有挑戰。
如果AI取代人類，最合理就係取代最貴而又重覆嘅經濟活動，以香港做例，例如開抗生素同藥生紙嘅「銷藥員」行為，唔使再預約後又排兩個鐘等「銷藥員」見你兩分鐘。但最值得被取代嘅項目多數都係有牌，持牌壟斷係貴嘅原因，亦係無法取代嘅原因。
機械人勢取代侍應
其他例如服務業，麥當勞（MCD）已公佈今年會應用AI係運貨同訂單上，服務餐飲業要交貨，即係要有硬件投資，麥當勞大公司有能力投資。而就算連兩餸飯都已應用機械人及AI，不過係講緊美國嘅Panda Express，其他地方嘅兩餸似乎仍然係用人力為主，但麥當勞一做，全球餐飲最終都會跟隨。
如果呢方面下功夫，則可解決香港服務業被指「西口西面」嘅問題，大部份工序用機械人取代人類，至於送餐則用返傳統嘅迴轉壽司運輸帶，啲餐未到得到ChatGPT式有禮貌而模稜兩可答案，可以預期，如果幫襯低端飲飲食食，以後服裝你嘅會係「冇口冇面」，一堆機械人同語言生成嘅回應。
至於冇再從事服務業嘅勞工會去咗邊？同大部份行業自動化後一樣，鐘錶出現電子錶後，手造上鏈錶變咗高檔投資產品、工廠可以大量生產手袋後，手造手袋又變得名貴。如果服務業自動化後，剩低嘅精英必走高檔路線，要咁上下消費，先會見到人類。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com