笑到最後 - 高明 2024年5月18日
英股今次係咪有如日股變成另一個持續上升嘅股市？ (Reuters / Reuters)
過去一個月，英國指數富時100忽然上升7.9%，升幅唔算特別多，低基數嘅恒指上升17.4%冠絕全球，高位嘅納指亦升5.5%，英股只不過係中中間間，不過，英股點數最高見8474點，喺5月破頂，就更加值得留意。
美股外幣即時報價 多國新聞任睇
英國股市都出現移民潮
過去一年升得最多嘅英國企業，叫做Arm（ARM），升幅119.9%，大家都知道佢做晶片架構授權。不過，佢係喺美國納斯達克上市，點升法都同倫敦冇關。一隻咁強勁嘅爆升股，竟然擦身而過，亦解釋咗英國股市嘅困局，早前高明亦曾經喺唔同場合提過，英國股市都出現移民潮，企業爭相避走英國，例如Shell（SHEL）行政總裁Wael Sawan暗示會放棄喺倫敦嘅主要上市地位，因為美國同業之間出現估值差距，其他企業亦有類似講法。有批評指英股係侏羅紀公園，因為得啲舊嘅大企業。
英國股市都出現移民潮，企業爭相避走英國，例如Shell（SHEL）行政總裁Wael Sawan暗示會放棄喺倫敦嘅主要上市地位。 (REUTERS / Reuters)
資料顯示，富時100指數入面，科技股只得2隻，比重1.31%，比重達雙位數嘅行業係醫藥、金融、工業及能源。就咁睇已經知同任何當炒嘅概念冇關。年初至今升得最多嘅分別係Natwest（NWG）、勞斯萊斯（RR）以及巴克萊（BARC）。
英股科技含量低 靠減息憧憬
點解而家富時100會升？同美國接近原因，就係市場預期今年英倫銀行減息兩次，而中東地區冇進一步嘅衝突而受到支持。另外，指數入面大約四分之三係大型國際公司，佢哋嘅收入係用美元計算，但盈利係用英鎊報告。咁即係當美元走強，呢啲公司用英鎊計算嘅盈利就會增加。較高嘅美國利率令持有美元變得更有吸引力，一邊美國減息一拖再拖，另一邊憧憬英國減兩次，巧合令英股破頂。
廣告
英股舊年2月已經突破疫情前高位，不過掂一掂就碌返落嚟，今次突破睇圖則比較清脆，星期四電訊商BT（BT）業績後股價升一成，今次升幅有業績支持，並非只係炒減息。
英國係最先支持烏克蘭國家，戰後重建一旦分到主要餅仔，已經係一個新嘅增長市場。 (Libkos via Getty Images)
終極問題係英股今次係咪有如日股變成另一個持續上升嘅股市？日經資訊科技比重超過24%，下一浪全球升幅如果由科技帶動，睇怕都冇英股份。炒減息雖然唔錯，不過英美一齊減息，資金優先一定係去美股。欠缺科技推動，英國經濟增長對比美國點都打折扣。
可以預見到對英國企業有利嘅事實，首選俄烏戰爭停戰。英國係最先支持烏克蘭國家，戰後重建一旦分到主要餅仔，已經係一個新嘅增長市場。雖然美國出錢最多，但換算市值，標普指數市值43.79兆美元，相對嚟講，就算成個烏克蘭受戰火影響地方畀哂標普500企業重建，對市值影響都係好細。富時100指數市值僅2.57兆美元，少少刺激英股就影響好大。
高明
IG
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com