笑到最後 - 高明 2024年6月15日
美股各股份走勢顯示，造淡只係得個吉。 (SunnyVMD via Getty Images)
過去嘅一個月，道指破頂、標普破頂、納指破頂， Nvidia（NVDA）高處未算高，甚至連蘋果（AAPL）都突破200美元水平，最弱嘅Tesla（TSLA）亦出現追落後勢頭。各股份走勢顯示，造淡只係得個吉。
美股外幣即時報價 多國新聞任睇
造淡 VS 無腦買TSLA
假設2020年疫情前造淡，到無限QE時平倉，唔算太複雜嘅動作，下跌時間好短，特朗普同聯儲局提曬淡友散水，好開心咁賺錢走。然而，如果同2020年開始無腦買TSLA嘅升幅比，即使後知後覺6月破疫情高位（現價計65美元）先追，2021年最高升至414.5美元，升幅5倍，中間任何時間賣都以倍數計升幅。
如果同2020年開始無腦買TSLA嘅升幅比，即使後知後覺6月破疫情高位（現價計65美元）先追，2021年最高升至414.5美元，升幅5倍。 (Peter Dazeley via Getty Images)
跌市時間短 難操作
再拎張標普500指數嘅圖，大概得知點解美股造淡結果只會慘淡：
1.時間太短，以2020年疫情計，由2月20日計，實際只係跌咗一個月，跌約36%，其實好多，但可以把握嘅時間唔多，除非你係背後首先知道有病毒而冇中病毒，否則遲咗入場回報爭好輸。反觀疫情後無腦之選標普指數ETF VOO，4月反彈一路猶豫唔入市，考慮4個月到8月破頂先入市，到升幅2022年1月加息周期開始股價見頂，有1年零4個月任何位沽都贏錢。雖然以上係倒後鏡，但標普跌快而短、升慢而長嘅走勢已經有幾十年歷史，所以即使係回帶睇，對未來一樣有參考價值。
2.正常智慧沽空係唔會瞓身。當然世上有唔正常智慧嘅人，一係絕頂聰明，一係白癡，會瞓身孖展十倍沽空，一個月發達並唔出奇，但大部份正常人唔會咁做，變相贏錢有限。而造好買正股，瞓身加孖展係好正常嘅行為，稍為由無腦VOO轉買疫後倍升股TSLA或Zoom（ZM），回報都一定多過沽空。
廣告
3.沽空嘅出手位唔多，疫情前係一次，加息周期係一次，但加息周期嘅2022年，來回挾淡倉嚴重，只能倒後車睇先可賺盡升幅，身處其中，最初市場仲否認有通脹，後尾改口通脹輕微 ，並冇明顯離場位，同疫情出哂Post救市唔同，靠個人感覺同經驗就死得，情況有如Nancy Pelosi同Cathie Wood炒股，一定係前者真女股神。
TSLA升完會有Eli Lilly（LLY），LLY嫌唔夠快，下隻會有NVDA，錯過曬以上三隻，買AAPL或微軟（MSFT）等回報唔錯。 (Scott Olson via Getty Images)
但股市流流長，冇可能贏一舖就走，造淡贏一舖，之後連續十幾舖睇中都會輸錢，何況會睇錯，細水長流沽空冇機會賺錢。相反，TSLA升完會有Eli Lilly（LLY），LLY嫌唔夠快，下隻會有NVDA，錯過曬以上三隻，買AAPL或微軟（MSFT）等回報唔錯，未來亦一定會有下一隻，到時自然會升到你知。
美股長線沽空完全冇值博，可以話美股係一個有缺陷嘅市場，缺少咗重要嘅沽空手段。
高明
IG
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com